Nafnið Nepal náði upprunalega aðeins yfir Kathmandudalinn og nánasta umhverfi hans, en nær nú yfir allt konungsríkið í suðurhlíðum Himalajafjalla, sem er u.þ.b. 800 km langt og 200 km breitt.  Lega þess er milli 26°20' og 30°10'N og 80°15' og 88°10'A.

Landið er að mestu fjalllendi, 65% þess liggja yfir 1000 m yfir sjó og 28% yfir 3000 m.  Á norðurlandamærunum er hákambur Himalajafjalla með mestu fjallarisum jarðar.  Auk fjölda fjallstinda, sem eru hærri en 7000 m, tróna þar átta aðrir yfir 8000 m (Mount Everest/Sagamatha 8848 m; Lhotse 8511 m; Dhaulagiri I 8167 m; Annapurna I 8091 m).  Árnar steypast bratt niður á Ganges-slétturnar í Indlandi og veðra landið ört.  Á síðustu fáum alda-tugum hafa þær grafið mörg þúsund metra djúp gljúfur í fjöllin.  Sunnan Há-Himalajafjalla er miðhálendið í 600-2000 m hæð, sundurskorið af dölum og hvilftum.  Það er kjarni landsins með þéttbýlissvæðum, einkum í aðaldölunum tveimur, Kathmandu og Pokhara.  Sunnar eru hryggir snarbratts og dölum skorins Siwalifjallgarðsins.  Við landamæri Indlands hefst láglendið (tarai), sem lækkar hægt og sígandi niður á Gangesslétturnar.