Næturlífið í Nepal er afar fábrotið.  Þjóðdansa- og söngvakvöld eru haldin í stóru hótelunum í Kathmandu á kvöldin, s.s. Gúrkamenning í Shankar hótelinu, Lali Guras menningarmiðstöðin í Manaslu hótelinu og Everest menningarfélagið í Lal Durbar.  Í nokkrum veitingastöðum stóru hótelanna er hægt að dansa eftir kvöldmat (Yak & Yeti, Soaltee Oberoi Sheraton).  Góð indversk tónlist er leikin undir borðum í veitingastaðnum Ghare-Kabab við durbar Marg.  Flestum þessum skemmtunum lýkur kl. 22:00.  Eina undantekningin er spilavítið í Soaltee Oberoi (rúlletta, 21, póker), sem er opið frá kl. 24:00 - 04:00.

Leik- og kvikmyndahús.  Þjóðleikhúsið (Rashtriya Nach Ghar, Kantipath) setur á svið sjónleiki á nepölsku og dans- og söngleiki.  Kvikmyndahúsin eru fá og sýna undantekn-ingalítið indverskar myndir.

Þjóðlegar uppákomur
Ýmiss konar þjóðhátíðir eru einkum haldnar á tímabilinu oktober til marz.  Þá eru dansað á götum og torgum og fólk ber skrautlegar grímur.  Í stóru hótelunum eru haldin þjóðlaga og dansakvöld allt árið.

Íþróttir
Nú sem fyrr koma margir ferðamenn til landsins til að fara í gönguferðir.  Nokkur stóru hótelanna bjóða sundaðstöðu og tennisvelli.  Golfleikarar ættu að kíkja í Royal Golf Club (9 holur) við flugvöllinn.  Í Gokarnagarðinum (15 mínútna akstur frá Kathmandu) er hægt að ríða út.  Battisputalli íþróttafélagið býður veggjatennis.  Í Annapurna og Soaltee hótelunum eru ball-skákarborð.  Við nokkur hinna minni hótela, Asan, Thamel o.fl., eru leigð út reiðhjól.  Ferðaskrifstofan International Trekkers skipuleggur svifdreka- og loftbelgjaflug.

MATUR  og  DRYKKUR
Matur.  Stór hótel og veitingastaðir á aðalferðamannastöðum bjóða vestræna rétti.  Matur innfæddra líkist indverskum mat, þótt hann sé ekki eins fjölbreyttur.  Aðaluppistaðan í nepölskum mat er mikið krydduð hrísgrjón, karrý og linsubaunir.  Newarimatreiðslan, sem er ríkjandi í Kathmandu er suðrænni og inniheldur hrísgrjón, flatbraut, iður, fuglakjöt og ristað bygg (Tsampa).  Þrátt fyrir að slátrun nautgripa sé bönnuð, fæst nautakjöt á flestum veitingastöðum.  Oftast er hægt að fá ferskan fisk frá Kalkútta.

Í miðbænum í Kathmandu er bakarí, þar sem hægt er að fá ýmiss konar kornbrauð, eins og við erum vön.

Drykkur.  Innflutt áfengi er einungis til á stóru hótelunum.  Veitingahúsin bjóða langflest einungis innlenda drykki (romm, vodka, gin, viskí og tvær tegundur bjórs, Star og Eagle'  Víðast hvar er hægt að fá heimabruggaðan landa (t.d. Chhang úr hveiti, hirsi eða maís) og Rakshi, sem er hrísgrjónabrennivín.

Veitingahús í Kathmandu
Veitingahúsið Chimney Room við hótelið Yak & Yeti er þekkt fyrir vestræna og rússneska sérrétti og vínblöndur.  Fjöldi veitingastaða býður innlendan og indverskan mat:  Himalchuli, Kabab Corner við Kantipath, Amber;  The Other Room í Crystal hótelinu og Ghare-Kabab í Annapurna hótelinu.

Góður kínverskur matur er framreiddur á eftirtöldum stöðum:  Arniko Room í Annapurna hótelinu;  Golden Gate við Durbar Marg;  Mountain City í Malla hótelinu.

Japönsk veitingahús:  Kushifuji við Durbar Marg;  Molisju í Lazimpat.

Ítalskur matur:  Al Fresco.

Eftirfarandi staðir eru ódýrari:  K.C.'s, rum Doodle, Red Square (vestrænn matur; öll í Thamel), Meihua við Kantipath, Kaushung í Thamel, Nanglo Chinese Room við Durbar Marg (öll með kínverskan mat), The Nest í Ambassador hótelinu í Lazimpat, Tripti við New Road, Tripati vi sundhara (indverskur matur), Gallery Room í Kathmandu Guest House og Kumari í Jochhe (nepalskur og newarískur matur).  Í veitingastaðnum Paradise í Jochhe er framreitt grænmetisfæði og næfurþunnt og stökkt flatbrauð.