HAM HOUSE er við Richmond í Surrey.  Brautarstöð:  Richmond.  Opið apríl - september þriðjudaga til sunnudaga kl. 14:00-18:00 og oktober til marz kl. 12:00-18:00 sömu daga.  Aðgangseyrir.

Ham House er í stórum garði í grennd við Richmond.  Það er hluti af Viktoríu- og Albertssafninu og hýsir húsgögn og húsmuni frá 17. öld.

Hið upprunalega Ham House var fremur einfalt óðal Sir Christopher Vavasour, sem byggði það (1610).  Um miðja 17. öld fékk Elísabet , greifafrú af Dysart, að erfðum eftir föður sinn.  Eftir að hún giftist hertoganum af Lauderdale, ráðherra og vildarmanni Karls II, lét hún stækka húsið á árunum 1673-75 í skrautlegum barokstíl þess tíma.  Til verksins voru kallaðir þýzkir, hollenzkir og ítalskir listamenn.  Að lokinni þessari andlitslyftingu hússins var því líkt við skrautlegustu híbýli konungsborins fólks.

Húsið er að mestu leyti varðveitt óbreytt frá dögum Lauderdales og sýnir, ásamt garðinum, í hvernig umhverfi aðallinn hrærðist á þessum tímum.

HAMPSTEAD HEATH Brautarstöð:  Hampstead.  Hampsteadsheiði er yndislegt svæði í Norður-London, vaxið skógarlundum og þakið tjörnum.  Þennan lystigarð hefur fólk, ekki sízt listamenn, kunnað að meta um langan aldur.  Hæsti punktur hans liggur 145 m yfir sjó.  Honum bregður oft fyrir í verkum listmálara, s.s. John Constable.  Í Old Hampstead eru íbúðarhús listamannsins John Keats og hið fagurlega innréttaða Fenton House (17. öld) skoðunarverð.

Skammt austan Hampstead er kirkjugarðurinn Highgate Cemetary, þar sem Karl Marx liggur grafinn.

**HAMPTON COURT PALACE er í East Molesey, Surrey, 25 km suðvestan London.  Lestarstöð:  Hampton Court.  Ferja leggur að við Hampton Court Bridge.  Opin:  Garðurinn á hverjum degi.  Höllin:  Maí - september mánudaga til laugardaga 09:30-18:00 og sunnudaga kl. 11:00-18:00;  nóvember til febrúar mánu-daga til laugardaga kl. 09:30-16:00 og sunnudaga kl. 14:00-16:00;  marz og apríl mánudaga til laugardaga kl. 09:30-17:00 og sunnudaga kl. 14:00-17:00.  Aðgangseyrir.

Hampton Court er sögð vera fegursta og áhugaverðasta konungshöll landsins.  Hún er suðvestan London á norðurbakka Thamse og hlutar hennar eru enn þá notaðir til að hýsa gesti drottningarinnar.

Hún var byggð á árunum 1514-1520 sem einkaheimili Wolsey kardínála, sem gaf hana Hinrik VIII síðar til að koma sér í mjúkinn hjá honum.  Á þessum tíma var 'Stóri salurinn' og fleiri viðbyggingar reistar.  Fimm hinna sex drottninga Hinriks VIII bjuggu þar (allar nema Katrín af Aragon) bjuggu þar.  Sagt er, að andar Jane Seymour, þriðju eiginkonunnar, og Catherine Howard, fimmtu eiginkonunnar, séu þar enn þá á ferli.  Elísabetu I, drottningu, sem dvaldi gjarnan í Hampton Court, bárust þangað féttirnar af sigrinum yfir (spænska) flotanum ósigrandi.  Karl I bjó þar líka oft, bæði sem konungur og sem fangi Olivers Cromwells.

Vilhjálmur III og María II gerðu verulegar breytingar á höllinni.  Vesturhliðin hélt Túdorstíl sínum en Christopher Wren endurnýjaði austurálmuna í endurreisnarstíl.  Eftirtaldir staðir í höllinni eru opnir almenningi til skoðunar:  Klukknagarðurinn með sólúr frá dögum Hinriks VIII, ríkissalirnir, þar með talinn draugasalurinn, hallarkapellan og stóri salurinn með hinu fagra bjálkalofti og glæstum veggteppum, eldhúsið, kjallarinn og Túdortennisvöllurinn, sem er notaður enn þá.

Garðarnir eru þess virði að ganga um þá:  Einkagarður konungs, Brunngarðurinn, Tudor- og Elísabetargarðurinn (Hnútagarðurinn) og 'The Broadwalks and Wilderness'.  Garðarnir eru falleg-astir um miðjan maí, þegar gróður er í fullum blóma.

Það er líka gaman að líta inn í gróðurhúsin:  Efra gróðurhúsið er opið frá apríl til september og neðra gróðurhúsið allt árið, bæði á sama tíma og höllin.  Í neðra gróðurhúsinu hangir eitt meistaraverka evrópskrar listar, 'Sigur Sesars' eftir A Mantegnas.

Séu börn með í ferð er upplagt að heimsækja völundarhúsið.

*HAYWARD ART GALLERY er á South Bank, SE1.  Brautarstöð:  Waterloo.  Opið mánudaga til fimmtudaga kl. 10:00-20:00, föstudaga og laugardaga kl. 10:00-18:00 og sunnudaga kl. 12:00-18:00.

Þetta listasafn er hluti hinnar nýju menningarmiðstöðvar á suðurbakka Thamse og útlit þess gefur gestum til kynna, hvað býr innandyra, nefnilega nútímalist.  Húsið var byggt í framtíðarstíl (New Stile) árið 1968 og skiptist eiginlega í tvær einingar.  Fullkominn tæknibúnaður er notaður til að skapa birtu og byggingarstíll hússins gerir sýningaraðstöðuna frábæra.  Ekkert herbergja er jafn-stórt og lofthæð er mismunandi og það er hægt að breyta hlutföllum og stærð þeirra með skilrúmum.  Í þremur görðum er styttum komið haganlega fyrir.

Sýningarsalirnir eru einkum notaðir til að sýna nútímamálverk Tatelistasafnsins, sem komast ekki fyrir þar vegna skorts á húsrými.  Auk þess er þar komið fyrir innlendum og erlendum skiptisýningum.  Yfirborgarstjórninni tókst með stofnun þessarar listamiðstöðvar að gera þennan borgarhluta virkan í listalífi borgarinnar.  Auk Haywardlistasafnsins eru þar tónlistahallirnar Royal Festival Hall og Queen Elizabeth Hall með Purcell-herberginu., kvikmyndahúsið The National Film Theatre með tveimur sýningarsölum og Þjóðleikhúsið með þremur sölum.

HENDON er í Hendon NW9 5LL.  Brautarstöð:  Colindale.  Opið mánudaga til laugardaga kl. 10:00-18:00 og sunnudaga kl. 14:00-18:00.  Aðgangseyrir.

Hendon er paradís þeirra, sem hafa áhuga á þróun hernaðarsögunnar, þá einkum flughersins.  Í safni konunglega flughersins eru a.m.k. 40 endursmíðaðar orrustuflugvélar og sérstaklega er lýst þróun brezka flughersins.  Í næsta nágrenni er safn um sögu baráttunnar um Bretland í síðari heimsstyrjöldinni.  Þar eru þýzkar, brezkar og ítalskar flugvélar, sem tóku þátt í stríðinu við Bretlandseyjar árið 1940.  Þar er líka eftirmynd af stjórnstöð flughersins í Uxbridge.

Í sprengjuflugvélasafninu eru nokkrar sjaldgæfar flugvélar, t.d. DH9A, Vulcan, Lancaster og Halifax.  Þar er sérstök sýning helguð Sir Arthur Harris og Sir Barnes Wallis, sem smíðaði fyrstu stökksprengjuna.

HMS  BELFAST er við Symons Whart, Vine Lane, Tooley Street, SE1 2JH.  Brautarstöðvar:  London Bridge, Monument og Tower Hill.  Skipið er opið gestum frá marz til oktober kl. 11:00-17:50 daglega og frá nóvember til febrúar kl. 11:00-16:30 daglega.  Aðgangseyrir.

Þessi síðasti, stóri tundurspillir konunglega sjóhersins var tekinn í notkun árið 1938.  Nokkrum mánuðum síðar skemmdist hann verulega á Firth of Forth, þegar hann sigldi á þýzkt tundurdufl.  Hann komst ekki í gagnið aftur fyrr en í nóvember 1942 og gegndi veigamiklu hlutverki við vernd skipalestanna, sem sigldu til Rússlands, og í orrustunni við Norðurhöfða í Noregi í desember 1943, sem endaði með því, að risaskipið „Sharnhorst” sökk.  Í júní 1944 var HMS Belfast í verndarflotanum við innrásina í Evrópu á D-degi.  Eftir síðari heimsstyrjöldina þjónaði tundurspillirinn á höfum Austurlanda fjær.  Árið 1963 var því lagt og var opnað sem safnskip fyrir fáum árum.

HORNIMAN MUSEUM AND LIBRARY er við London Road, Forest Hill, SE23 3PQ.  Lestarstöð:  Forest Hill.  Opið mánudaga til laugardaga kl. 10:30-18:00 og sunnudaga kl. 14:00-18:00.

Frederick J. Horniman ánafnaði þjóð sinni safni hljóðfæra og dýrafræðisafni.

Hljóðfærasafnið er mjög yfirgripsmikið, einkum eru blásturs- og strengjahljóðfæri áberandi.  Sérstök fræðsla er um tónlistarsöguna og smíði hljóðfæra.

Dýrafræðisafnið nær yfir allt svið þróunarinnar, frá frumdýrum til skordýra, skriðdýra, fugla og spendýra.

HORSE GUARDS er í Whitehall, SW1.  Brautarstöðvar:  Embankment, Charing Cross.  Vaktaskipti mánudaga til laugardaga kl. 11:00 og sunnudaga kl. 10:00.  Nafnakall kl. 16:00.

William Kent lét reisa formfagurt hús árið 1753, sem fékk nafnið Horse Guards.  Það stendur við torgið, þar sem vakthúsið við gömlu Whitehallhöllina stóð.  Nú nýta ríkisstjórnir það fyrir ýmiss konar starfsemi.

Riddaraherdeildin er samansett úr tveimur aðskildum deildum, lífvörðunum í skarlatrauðum frökkum með hvíta fjaðurbrúska á hjálmum. og hinum bláu og konunglegu í bláum frökkum með rauðar fjaðrir á hjálmum.  Lífvörðurinn á rætur sínar að rekja til gömlu riddaranna, sem voru líf-verðir Karls I í borgarastyrjöldinni, og hinir 'bláu' og 'konunglegu' rekja uppruna sinn til riddara Cromwells.

Vaktaskiptin kl. 11:00 á hverjum degi nema sunnudaga, þegar mikil skrúðganga á sér stað kl. 10:00, eru skemmtileg sýning fyrir ferðamenn.

Herdeildin á samastað í Hyde Park-herstöðinni í Knightsbridge og þess er gætt, að nýja vaktin ríði þennan 1½ km spöl til Whitehall samtímis vaktaskiptum fótgönguliðsins við Buckinghamhöll.

Í júní fer fram skrautleg athöfn („Trooping the Colour”) á æfingarsvæði riddaranna við Horse Guards á afmælisdegi drottningarinnar.

HYDE PARK.  Brautarstöðvar:  Hyde Park Corner, Marble Arch, Lancaster Gate. Hyde Park og Kensington-lystigarðarnir eru stærstu grænu svæðin í Lundúnum (rúmlega 2 km frá austri til vesturs og 900 m breitt).  Westminster Abbey átti garðinn upprunalega, en Hinrik VIII gerði hann að veiðilendum árið 1536.  Karl I opnaði garðinn almenningi árið 1635.  Drottning Georgs II, Karólína af Ansbach, lét gera hlykkjóttu tjörnina árið 1730, þar sem hægt er að sigla, synda og skoða fuglalífið.  Norðan tjarnarinnar er fuglagarður með styttu eftir Epstein.  Sunnan hans er veitingastaður og fallegur baðstaður.  Decimus Burton (1828) gerði þriggja boga hliðið, aðal-inngang garðsins, við Hyde Park Corner.  Bogarnir eru skreyttir lágmyndum, sem eru eftirmyndir af Parthenon.  Rétt hjá bogunum er stytta af Akkílesi, sem Westmacott reisti til heiðurs hertoganum af Wellington árið 1822.  Hún er gerð úr fallbyssukúlum, sem járnhertoginn tók herfangi.  Þessi stytta er eftirmynd af styttu í Quirinal í Róm.  Skammt frá henni er tónlistarlaufskálinn, þar sem tónlistar-menn leika á sunnudögum á sumrin.

Frá Hyde Park Corner liggja þrír stígar gegnum garðinn.  Vinstri stígurinn ('The Carriage Road') liggur að Albertsminnismerkinu.  Hægri stígurinn ('East Carriage Road) liggur að Marmaraboganum (Marble Arch) og Ræðumannshorninu (Speakers Corner).  Miðstígurinn ('Rotten Row', líklega afbökun á frönsku orðunum 'Route de Roi') er 1600 m langur og ætlaður fólki á hestbaki.

HYDE PARK CORNER.  Brautarstöð:  Hyde Park Corner.  Á Hyde Park Corner er sigurbogi Wellingtons ('Wellington's Arch') til minningar um sigurinn yfir Napóleon við Waterloo.  Ofan á boganum er fereyki úr bronzi, tákn friðarins.  Bronzstytta af hertoganum á hestbaki snýr að Apsley House (Wellingtonsafnið), þar sem hann bjó.  Á hornum styttunnar eru fjórar smástyttur af enskum fótgönguliðsmanni, skozkum Hálendingi, velskri skyttu og norðurírskum drekariddara.

Tvö önnur stríðsminnismerki eru á Hyde Park Corner, stórskotaliðsminnismerkið frá 1928 ('Royal Artillery War Memorial') til heiðurs þeim, sem féllu fyrstir af því liði í fyrri heimsstyrjöldinni, og minnismerki um vélbyssuherdeildirnar ('Machine Gun Corps Memoria') frá 1927 með styttu af Davíð konungi úr gamla testamentinu.

Mynd:  Roundhouse Pub.

A - B - C - D - E - F - G - H - J - K - L