Pennsylvania er eitt Mið-Atlantshafsfylkjanna.  Norðan þess eru Erie-vatn og New York, austantil eru New York og New Jersey, sunnantil eru Delaware, Maryland og Vestur-Virginía og vestantil eru Vestur-Virginía og Ohio.  Austurlandamærin fylgja Delaware-ánni.  Flatarmál þess er 117.363 km² (33. í stærðarröð BNA).  Íbúafjöldinn 1997 var tæpar 12 milljónir (9% negrar).  Þýzkir og hollenzkir innflytjendur settust að víða um fylkið.

Pennsylvania varð 2. fylki BNA 12. desember 1787, eitt stofnfylkjanna.  Bæði sjálfstæðisyfirlýsingin og fyrsta stjórnarskrá BNA voru festar á blað í fylkinu.  Allt frá nýlendutímanum hefur Pennsylvania verið mikilvægt landbúnaðarsvæði og síðar miðstöð viðskipta, iðnaðar og námuvinnslu.  Snemma á 10. áratugi 20. aldar var fylkið í fremstu röð í iðnaði og námuvinnslu.  James Buchanan forseti fæddist þar.  Karl II Englandskonungur er líklega höfundur nafns fylkisins.  Hann notaði eftirnafn William Penn, flotaforingja, sem hann setti yfir nýlenduna 1681, og latneska orðið sylva (skógur).  Fylkið er oft kallað Keystone State (Lokusteinsfylkið).  Aðalborgir fylkisins eru:  Fíladelfía, Pittsburgh, Erie, Allentown og Scranton.