Pittsburgh er næststærsta borgin í Pennsylvaníu.  Hún er miðstöð fjármála og flutninga við annasömustu höfn landsins.  Til hennar liggja margar járnbrautir, siglingaleiðir fjölda áætlanaskipa, aðalþjóðvegir og skammt utan borgar er millilandaflugvöllur.  Fjöldi stórfyrirtækja hefur aðalstöðvar í borginni.  Í kjölfar hruns stáliðnaðarins í borginni tókst að efla efnahagslífið á ný með öðrum greinum, s.s. hátækniframleiðslu og heilbrigðisþjónustu.  Pittsburgh er fremst í heiminum í líffæraígræðslum og þar er fjöldi rannsókna- og tilraunastofnana.  Helztu framleiðsluvörur borgarinnar eru tæknibúnaður til sjálfvirkni í iðnaði, hugbúnaður og líftækni.  Í borginni eru rúmlega 700 brýr og borgin oft nefnd Brúaborgin.

Meðal æðri menntastofnana borgarinnar eru Borgarháskólinn, Carnegie Mellon-háskólinn, Duquesne-háskólinn (1878), Carlow-háskólinn (1929), Tækniháskólinn (1794) og Öldunga-guðfræðiháskólinn (1810).  Meðal áhugaverðra staða eru Frick-listasafnið, Listasafni borgarinnar, Sarah-Mellon Scaife-listasafnið, Vísindamiðstöðin og Náttúrugripasafnið.  Carnegie-stofnunin rekur öll þessi framangreindu söfn.  Þá má nefna Vísindastofnun almennings, Phipps-tónlistarhöllina og Allegheny-höllina.  Meðal leikvanga borgarinnar er Three Rivers Stadium, sem er notaður fyrir leiki úrvarlsliða í ruðnings- og hafnarbolta.  Í borginni starfar symfóníuhljómsveit, ballet, ópera og Borgarópera.

Bretar og Frakkar gerðu kröfu til lands við ármót Allegheny- og Monongahela-ánna.  Samkvæmt ráðum George Washington, sem hafði heimsótt þetta landsvæði árið 1753, var send hersveit frá Virginíu til að leggja svæðið undir sig næsta ár og hefja smíði virkis.  Innan þriggja mánaða réðust Frakkar og indíánar á Virginíumennina, sem urðu að hörfa.  Frakkar luku smíði virkisins og kölluðu það Fort Duquesne.  Síðla árs 1758 réðist herleiðangur Breta undir stjórn John Forbes, hershöfðingja, á virkið.  Hann náði því undir sig eftir að Frakkar höfðu lagt það í rúst sjálfir áður en þeir flýðu af hólmi.  Nýja virkið, sem Bretar reistu, var kallað Pitt-virkið til heiðurs brezka forsætisráðherranum William Pitt, fyrsta jarlinum af Chatham.

Í kjölfar frelsisstríðsins óx Pittsburgh sem birgðastöð landnemanna á vesturleið.  Í kringum 1792 byggði George Anshutz bræðsluofn á staðnum.  Það var fyrsta skrefið í þróun járn- og stálvinnslunnar, sem fór fyrst að vaxa verulega eftir 1850.  Árið 1797 reis fyrsta glerverksmiðja borgarinnar og árið 1804 var fyrsta vefnaðarverksmiðjan byggð.  Árið 1834 var Pennsylvanía-skipaskurðurinn opnaður og Portage járnbrautin einnig.  Báðar þessar samgönguleiðir tengdu borgina við Fíladelfíu og færðu borgarbúum aukin viðskipti.  Mikil endurskipulagning atvinnuvega hefur farið fram í borginni síðan á sjötta áratugi 20. aldar.  Í tengslum við þær hefur verið hugað vel að mengunarvörnum, flóðavörnum og afrennslismálum.  Áætlaður íbúafjöldi 1990 var tæplega 370 þúsund.