Moskva, stærsta borg Rússlands, er höfuðborg og innlandshafnarborg landsins.  Hún var höfuðborg Sovétlýðveldanna til 1991.  Hún er einnig höfuðborg héraðsins Moskva-Oblast við Moskvuána.   Moskva er söguleg móðurborg allra Rússa og miðstöð stjórnmála og menningar allra landsmanna.  Hún er miðstöð samgangna í lofti, á landi og á vatnaleiðum.  Skipgengar vatnaleiðir eru m.a. Moskvuskurðurinn, Moskvuáin og Volga-Don-skurðurinn, þannig að borgin er tengd Eystrasalti, Hvítahafi, Svartahafi og Kaspíahafi auk Azovshafs.  Heildarflatarmál borgarinnar er tæplega 900 ferkílómetrar.  Sammiðja hringvegir borgarinnar voru lagðir, þar sem stóðu fyrrum varnarmúrar, og skipta borginni í borgarhluta.  Fjærst miðborginni eru íbúðahverfi.  Í miðju þessara hringvega og hálfhringvega er Kreml, fyrrum setur stjórnar landsins og Rauða torgið.  Lestakerfið neðanjarðar er velskipulagt og brautarstöðvarnar eru skreyttar marmara.

Kreml stendur við bugðu á bökkum Moskvuár.  Veggir Kremlar eru allt að 21 m háir og yfir þeim gnæfa 19 turnar.  Þeir umkringja þríhyrningslagað svæði með höllum og kirkjum og öðrum minnisvörðum keisaradæmisins allt frá miðöldum.  Byggingu stóru Kremlarhallarinnar lauk árið 1849 og hún er mest áberandi innan múranna.  Granovitaya-höllin (1491) og Terem-höllin (1636) njóta sín líka vel.

Meðal kirkjubygginga, sem eru nú aðallega söfn, eru Krýningarkirkjan og Erkiengilskirkjan, báðar með gylltum kúplum og Uppstigningarkirkja Maríu (13.-14. öld) með níu gylltum kúplum.  Turn Ívans mikla er 98 m hár bjölluturn.  Á palli við hlið hans stendur Keisarabjallan (u.þ.b. 200 tonn), einhver stærsta kirkjuklukka heims.  Henni var aldrei hringt.  Nýleg viðbót við Kreml er ráðstefnuhöllin, sem var lokið við árið 1961.  Í þessari risabyggingu voru haldnir fundir Sovétlýðveldanna og kommúnistaflokks landsins.  Húsið hefur einnig verið notað sem leikhús og aðrar listgreinar hafa verið hýstar þar.

Kirkja hl. Basils er fræg fyrir einstakan byggingarstíl og litaða kúpla.  Hún er við annan enda Rauða torgsins.  Undir Kremlarmúrum við Rauða torgið er grafhýsi Lenins með jarðneskum leifum hins horfna leiðtoga.

Eitthvert kunnasta hverfi Moskvu er „Kitaigorod”, Kínverska borgin, sem er gamla verzlunarhverfið austan Kremlar.  Þar eru nú margar stjórnarbyggingar.  Meðal annarra áhugaverðra staða í borginni eru Leninleikvangurinn með u.þ.b. 130 byggingum fyrir ýmsar íþróttir og Ostankino sjónvarpsturninn með snúningsveitingahúsi og útsýnispalli.

Viðskipti og iðnaður.  Auk þess að vera hafnarborg fimm hafa og þess vegna einhver mesta verzlunarborg heims er Moskva leiðandi iðnaðarborg sem framleiðir u.þ.b. sjöttung allra iðnvara, sem voru framleiddar í Sovétríkjunum.  Raforka er næg í borginni og iðnaðurinn mjög fjölbreyttur.  Meðal þess, sem framleitt er, eru flugvélar, hágæðastál, kúlulegur, bifreiðar og önnur farartæki, smíðavélar, raftæki, nákvæmnistæki, viðtæki, efnavara, textílvara, skór, pappír, húsgögn og skotfæri.  Framleiðsla matvæla, prentun og járnbrautaviðgerðir eru mikilvægar iðngreinar.  Nokkrar nágrannaborganna, sem verða smám saman hluti af Stór-Moskvu, eru miklar iðnaðarborgir.

Menningarstofnanir.  Í borginni eru rúmlega 75 æðri menntastofnanir en ríkisháskólinn er hin mikilvægasta og var hin stærsta í fyrrum Sovétríkjunum.  Nærri 700 vísindastofnanir eiga sér höfuðstöðvar í Moskvu.  Meðal stórkostlegra safna eru Tretyakov listasafnið, A.S. Pushkin listasafnið, Ríkissögusafnið, V.I. Leninsafnið og Safn um austurlandamenningu.  Safnið um efnahagslegan árangur er hýst í 72 sölum, þar sem rakin er saga iðnaðar, landbúnaðar, vísinda og menningar.  Umhverfis safnið er grasagarður Rússnesku vísindaakademíunnar.

Söguágrip.  Árið 1147 hófst saga borgarinnar sem hluta af furstadæminu Suzdal.  Ekki er ljóst, hvenær byggð hófst þar.  Saga þorpsins, sem varð að stórborg, hófst árið 1295, þegar það varð höfuðborg hins nýstofnaða furstadæmis Moskvu.  Vöxtur bæjarins var sérstaklega hraður á fyrri hluta 14. aldar, þegar völd og auður hlóðust á furstadæmið.  Árið 1325 fluttist erkibiskup rétttrúnaðarkirkjunnar til Moskvu og gerði borgina að trúarlegri miðstöð landsins.  Ívan III Vasilyevich, stórhertogi (1462-1505), sem sameinaði rússnesku furstadæmin, gerði Moskvu að stjórnmálalegri höfuborg.  Rússneska stjórnin var flutt til Pétursborgar árið 1712.

Moskva hefur oft orðið fyrir miklum áföllum, s.s. eldsvoðum, plágum, uppþotum, uppreisnum, umsátrum og erlendri hersetu.  Hersveitir Napóleons náðu borginni á sitt vald 12. sept. 1812.  Rússneskir föðurlandsvinir brenndu borgina, svo að Frakkar urðu að hverfa þaðan og yfirgefa Rússland.  Íbúar borgarinnar tóku þátt í byltingunni 1905 og októberbyltingunni 1917.  Eftir hina síðari varð Moskva höfuðborg Sovétríkjanna.  Stórir hlutar borgarinnar voru endurbyggðir eftir sigur bolsévíka.  Þjóðverjar komust inn í úthverfi borgarinnar í desember 1941 en voru hraktir brott.  Árið 1991 var borgin miðpunktur þeirra atburða, sem leiddu til hruns Sovétríkjanna.  Áætlaður íbúafjöldi árið 1990 var tæplega 9 milljónir.

Íslenskir ríkisborgarar verða að hafa gilda vegabréfsáritun í vegabréfi sínu þegar ferðast er til Rússlands.
Þegar sótt er um vegabréfsáritun til Rússlands verður að framvísa eftirfarandi:

• Eina passamynd í stærð 35 til 45 mm með ljósum bakgrunni (ekki brosandi skv. ICAO - reglum).
• Útfyllt spurningaeyðublað, sjá hlekk hér að neðan
• Vegabréfi sem gildir í a.m.k. 6 mánuði eftir áætlaða brottför frá Rússlandi.
• Nákvæmar upplýsingar um fyrirhugaða ferð (flug og gisting)
• Bréf til staðfestingar á umsókn um vegabréfsáritun frá ferðaþjónustuaðila.
• Sönnun fyrir að umsækjandi sé með gilda alþjóðlega sjúkratryggingu

 MOSKVA er ein af ellefu borgum í Rússlandi sem riðlakepni HM 2018. mun fara fram

Ísland er fámennasta landið í sögunni sem tryggir sér sæti á lokamóti HM í knattspyrnu karla (2018) eftir 2:0-sigur á Kósóvó á Laugardalsvelli 9. oktober 2017.
Strákarnir dvelja hótel Nadezhda í bæn­um Gelendzhik við Svarta­hafið á meðan HM stendur yfir.