Konungsríkið Danmörk nær líka yfir Færeyjar og Grænland, sem voru í raun nýlendur Dana áður en þær fengu sömu réttindi og Danmörk bauð þegnum sínum í heimalandinu.  Færeyjar eru alls 1396 km² og Grænland, sem er hluti Norður-Ameríku, er 2.175.600 km² (þar af 1.833.900 km² jökull).  Færeyingar eiga sína eigin sögu, menningu og tungumál, sem er hvað líkast íslenzkunni af Norðurlandamálunum.  Þeir fengu heimastjórn 1948.  Grænlendingar (inúítar) bjuggu fyrrum í mjög dreifðum byggðum með ströndum fram og þeir eiga sér merka menningu, sögu og eigið tungumál, sem er með öllu óskylt norrænum tungum.  Grænland fékk heimastjórn 1979.