Buenos Aires er fylki og höfuðborg ríkisins.  Borgin er á bökkum Plataárinnar, 240 km frá Atlantshafi.  Hún er einhver mikilvægasta hafnarborg í heimi og meðal fjölmennustu borga heims.  Borgin sjálf nær yfir u.þ.b. 200 km² svæði en séu útborgir taldar með er svæðið tæplega 4000 km².  Spænskir sjómenn 16. aldar nefndu höfnina eftir verndardýrlingi sínum samkvæmt gamalli hefð og kölluðu hana „Santa María del Buen Aire” (Heilög María góða loftsins).

Borgin er miðstöð allrar þjóðarinnar fyrir viðskipti, iðnað, stjórnmál og menningu.  Auður og áhrif hennar skyggja á aðra hluta þjóðarinnar og hún veldur líka mestum erfiðleikum í efnahagslífi og félagslegum málum þjóðarinnar.  Vegna legu sinnar hefur hún tíðum verið aðalvettvangur stjórnmálalegrar og félagslegrar ólgu.  Argentínska skáldið og heimspekingurinn Ezequiel Martinez Estrada hefur kallað borgina „höfuð Golíats”.  Þessi myndlíking táknar ójafnvægið milli borgarinnar og annarra hluta landsins, sem lítur út eins og líkamslítill risi með of stórt höfuð.

Þessi rúmlega 420 ára borg glímir við flest sömu vandamál og aðrar milljónaborgir.  Vaxandi iðnaður veldur aukinni mengun og takmarkað lóðaframboð hefur leitt til byggingar háhýsa, sem hafa leitt til aukins fólkssteymis til borgarinnar.  Of hröð fólksfjölgun veldur ónógri félagslegri þjónustu og ört stækkandi fátækrahverfum.  Há verðbólga bætist við vandamál líðandi stundar og hamlar umbótum.  Hvað sem þessu öllu líður sjást merki um framfarir og styrkleika borgarinnar.

ARGENTÍNA