Stjórnsýsla.  Stjórn borgarinnar er í höndum borgarstjóra og kjörinna borgarfulltrúa.  Framkvæmda- og löggjafarvald borgarstjórnarinnar er takmarkað vegna afskipta ríkisstjórnarinnar, sem situr í borginni.

Lögum samkvæmt stjórnar forseti landsins borginni og þingið er ábyrgt fyrir löggjöf, sem snertir hana.  Forsetinn skipar borgarstjóra.  Borgarfulltrúar þjóna ráðgefandi hlutverkum og á tímum herstjórna, hafa þær ráðið lögum og lofum.  Borginni er skipt í stjórnsýslusvæði, sem eru ekki bundin hverfaskiptingunni, þótt þannig sé í sumum tilfellum.  Hvert slíkt svæði hefur sína stjórn, sem annast hagsmuni íbúa þess.

Þjónusta.  Flestar félagslegar þjónustustofnanir eru á vegum hins ríkisins og óháðar borgarstjórninni, sem sér aðeins um gatnakerfið og garða borgarinnar.  Stöðug og mikil fjölgun borgarbúa og stjórnlaus stækkun fátækrahverfanna hefur valdið brestum í félagslegri þjónustu.  Vatnsveita, fráveita og skolpkerfi eru á ábyrgð og undir stjórn heilbrigðisstjórnar ríkisins.  Vatnshreinsunarverið í Palermo-garðinum hreinsar vatn úr Plataánni og veitir því í geyma um alla borgina.  Ríkishlutafélög annast rafveitu, símaþjónustu og gasveitu frá olíusvæðunum norðan, sunnan og vestan borgarinnar.

Heilbrigðismál.  Einka- og ríkisreknir spítalar, heilsugæzlustöðvar, apótek og hreinsunarstöðvar eru rekin í hverfum borgarinnar.  Fjöldi sjúkrarúma miðast við að geta veitt íbúum annarra landshluta þjónustu líka.  Sorphreinsun byggist á brennslustöðvum, en mestur hluti sorpsins er notaður í tippa meðfram Plataánni.  Slíkar landfyllingar eru notaðar undir garða, íþrótta- og byggingarsvæði.

Menntamál.  Argentínumenn eru meðal menntuðustu þjóða heims og borgarbúar eiga kost á beztu menntastofnunum landsins.  Grunnskólakerfið er hverfaskipulagt og ríkið rekur sérstaka miðskóla.  Nemendur þeirra og annarra skóla, sem katólska kirkjan eða önnur trúarfélög reka, stefna að stúdentsprófi.  Stjórnarfarið í landinu hefur ekki dregið úr fjölda afburðanemenda og kennara.  Menntamenn hafa unnið til Nóbelsverðlauna á sviði læknisfræði og vísinda.  Stjórnmálaleg óreiða í rekstri Buenos Aires-háskóla olli stofnun nokkurra einkarekinna háskóla, s.s. Belgrano-háskóla.  Meðal annarra háskóla í borginni eru Morónháskólinn og tveir stórir katólskir háskólar.

Menningarlífið.  Ráðandi hlutverk borgarinnar í athafnalífi landsins kemur einna bezt í ljós í menningarlífinu.  Höggmyndasöfn eru fjöldamörg, s.s. við Calle Florida, Avenida Santa fe og í endurbyggðum nýlenduhúsum í San Telmo-hverfinu.  Allar nýbylgjur í listaheiminum eru virkar og auðvelt er að fylgjast með listaþróun heimsins í Buenos Aires.  Flestir helztu óperusöngvarar heims leggja leið sína til borgarinnar fyrr eða sienna og koma fram í hinu frábæra Colón óperuhúsi.  Pólitísk óreiða hefur haft slæm áhrif á menningarlíf borgarinnar, þar eð herstjórnirnar voru með puttana í því og vildu stjórna og takmarka listalífið.  Dagblöð hafa einkum orðið að berjast fyrir ritfrelsi í stjórnartíð herstjórna.  Borgin er einhver mesta miðstöð útgáfustarfsemi í Latnesku-Ameríku og þar er gefinn út fjöldi dagblaða og sum þeirra á erlendum tungumálum.  Tvö þessara blaða, La Prensa og La Nación, eru heimsþekkt.

Leiklist.  Mikilvægasta leikhús borgarinnar er Colón, sem þjónar þjóðaróperunni, þjóðarballettinum og synfóníuhljómsveitinni líka.  Í San Marín borgarleikhúsinu eru þrjú leiksvið og Listasafn.  Leikhús Alvear forseta býður leikverk daglega.  Cervantes þjóðleikhúsið er meðal velsóttra leikhúsa.  Margir áhugaleikhópar eru virkir og í La Boca er óperusvið undir berum himni.  Leikhús, sem bjóða þjóðlög og dansa (penas) eru mjög vinsæl.

Söfn.  Safnaflóran er fjölbreytt og borgin rekur sum þeirra.  Bernardino Rivadavia þjóðvísindasafnið er auðugt af steingervingum og rekur vísindastofnun.  Þjóðlistasafnið býður verk heimsþekktra og argentínskra málara og myndhöggvara og Skreytilistarsafnið hýsir glitvefnað og gömul húsgögn.  Í Isaac Fernández Blanco borgarlistasafninu er að finna verk spænsk-amerískra listamanna, s.s. silfursmíð í endurgerðu nýlenduheimili.  Önnur söfn sýna spænska, ítalska og nútímalist og einnig er að finna mörg söguleg söfn.

Bókasöfn eru víða um borgina, bæði á vegum borgarinnar og háskólanna.  Þjóðarbókhlaðan er stærsta bókasafn borgarinnar í nútímabyggingu í Barrio Norte.

Afþreying.  Borgin er prýdd fjölda grænna svæða (espacios verdes), s.s. torgum, skemmtigörðum og trjáprýddum breiðgötum.  Elzti skemmtigarðurinn er Palermo og garðarnir Alirante Brown í Riachuelodalnum og Tres de Febrero voru gerðir á landfyllingum við Plataána.

Hestaíþróttir eru mjög vinsælar, einkum póló, sem er þjóðaríþrótt Argentínumanna.  Pato er önnur hestaíþrótt, sem nýtur mikilla vinsælda, og á rætur sínar að rekja til pampa indíána, sem lifðu hirðingjalífi.  Vinsælasta hópíþróttin er knattspyrna, sem menn leika í skemmtigörðum og víðar um alla borg.  Meðal íþróttamannvirkja borgarinnar eru kappakstursbrautir, dýra- og grasagarðurinn, leikvangar við háskólana, sundlaugar og margs konar siglinga- og íþróttaklúbbar.