Opinbert nafn landsins er Bandaríki Mexíkós (Estados Unidos Mexicanos).  Norðurlandamærin liggja að BNA, að vestan og sunnan er Kyrrahafið, að austan er Mexíkóflói og Karíbahaf og í suðaustri eru landamærin að Gvatemala og Belize.  Heildarflatarmál þessa þríhyrningslagaða lands er 1.958.201 km².  Vegalengdin milli norðvestur- og suðvesturhornanna er 3000 km og breiddin er á milli 223 km á Tehuantepeceiðinu og 1982 km í norðurhlutanum.  Mexíkó er þingbundið forsetalýðveldi. 

Þingið starfar í tveimur deildum, öldunga- og fulltrúadeild (128+500).  Höfuðborgin er Mexíkóborg.  Opinbert tungumál er spænska en opinber trúarbrögð eru engin.  Gjaldmiðillinn er peso = 100 centavos.

Landið er auðugt af verðmætum jarðefnum, takmarkað land til ræktunar og mjög hraða íbúafjölgun.  Rúmlega helmingur íbúanna býr í miðhlutanum og mun strjálbýlla er í þurrum norðurhlutanum og hitabeltinu í suðurhlutanum.  Hugmyndir margra um hægfara og rólegt líf landsmanna, að þeir séu flestir sjálfsþurftarbændur, eru langt frá sannleikanum.  Olían og ferðaþjónustan eru orðin aðalhvatar efnahagslífsins og iðnvæðingin er á harða spretti víða um land.
.