Flóttinn úr dreifbýlinu hefur valdið sprengingu í borgum landsins og tveir þriðju hlutar landsmanna búa nú í eða við borgir.  Mexíkóborg er meðal stærstu borga í heimi, ef úthverfi og samvaxnar byggðir eru teknar með í reikininginn.  Flestir landsmenn eru fátækir, þrátt fyrir félagslegar framfarir allt frá sjöunda áratugnum.  Óðaverðbólga hefur geisað í landinu frá níunda áratugnum og erlendar skuldir landsins orðið framförum að fótakefli.

Það eru miklar andstæður í þessum vaxtarverkjum og hefðbundnu lífi fólks í afskekktum byggðum dreifbýlisins.  Víða eru smáþorp byggð indíánum, sem hafa ekki efni á að létta sér verkin og búa á sama hátt og forfeðurnir.  Það er enginn samnefnari milli glæsilegra minja fornra menningarsamfélaga indíána (Chichén Itzá eða Tulum) og nýlendubæja nútímans, s.s. Taxco eða Querétaro.  Nýlenduborgirnar eru þó fornlegar, þegar þær eru bornar saman við nútímaborgina Mexíkóborg. Þessar miklu menningar- og efnahagsandstæður og hin fjölbreytta náttúra gefa landinu hið sérstaka yfirbragð og séreinkenni.