Franska Quebec, austurfylki Kanada, er 1.540.680 km² að flatarmáli og stærst fylkja landsins og næststærst hvað íbúafjölda snertir (Ontaríó er fjölmennara).  Fylkishöfuðborgin er Quebec, sem er elzt borga Kanada.  Montreal er næststærsta borg landsins.  Fylkismörkin eru Hudsonsund og Ungavaflói í norðri, Labrador í austri, St. Lawrenceflói og Nýja-Brúnsvík í suðaustri, Maine, New Hampshire, Vermont og New York (BNA) í suðri og vesturmörkin eru Ontaríó og Hudsonflói.

Nauðsynlegt er að skyggnast um í sögu fylkisins til að skilja núverandi ástand þess.  Sagan segir okkur frá frönsku landnámi og nýlendustofnun á 16. öld.  Allt frá því að Bretar náðu Nýja-Frakklandi undir sig 1763 hefur mikill tími og fyrirhöfn farið í að reyna að samræma þarfir hinna fjölmennari frönskumælandi íbúa og hinna efnahagslega ráðandi, enskumælandi íbúa.  Breytingar á stærð fylkisins og stjórnmálaegum stofnunum þess hafa lítil áhrif haft á vilja meirihlutans í þá átt, að gera samfélagið frönskumælandi eingöngu.  Á síðari hluta 20. aldar var þetta aðalumræðuefnið um land allt.