Quebec er hafnar- og höfuðborg Quebecfylkis í Kanada við ármót St. Lawrence- og Saint-Charlesánna, u.þ.b. 240 km norðaustan Montreal.  Fyrstur Evrópumanna til að heimsækja þessar slóðir var Jacques Cartier, landkönnuður, sem fann þorp huronindíána þar 1535.  Árið 1608 hóf Samuel de Champlain fyrstu varanlegu búsetu í Quebec, sem óx upp úr skinnaverzlunarstað.

Árið 1629 tóku Bretar yfirráðin og héldu þeim þar til Frakkar fengu hann aftur með Saint-Germain-en-Lavesamningnum.  Upp frá því óx staðurinn og dafnaði.

Árið 1690 reyndi Sir William Phipps, ríkisstjóri Massachusetts að leggja Quebec undir sig með flota sínum en de Frontenac, greifa og ríkisstjóra, tókst að verjast.  Brezkur floti strandaði á sandeyrum í St. Lawrencefljóti, þegar hann var á leið til að ná bænum á sitt vald árið 1711.  Engu að síður tókst þeim loks árið 1759 að ná honum á sitt vald og Frakkar urðu að láta hann af hendi með samningunum í París 1763.  Í sjálfstæðisstríði BNA reyndu Bandaríkjamenn að leggja Quebec undir sig án árangurs. 

Árið 1791 var Quebec gerð að höfuðborg Neðra-Kanada, sem varð síðar Quebecfylki.  Nágrannabæir voru sameinaðir bænum og hann fékk borgarréttindi 1840.  Árið 1864 var haldin ráðstefna Brezku Norður-Ameríku í Quebec til að skipuleggja sameiningu Kanada.  Í síðari heimsstyrjöldinni hittust Franklin D. Roosevelt, Bandaríkjaforseti, og Winston Churchill, forsætisráðherra Breta, tvisvar í borginni til að skipuleggja innrásina í Evrópu.

Þjónustu- og stjórnsýslugeirarnir eru stærstu atvinnuveitendur borgarinnar, þótt hún sé engu að síður meðal mikilvægustu hafnarborga Kanada.  Helztu iðnfyrirtækin stunda prentun, kornmölun, framleiðslu vindlinga og fatnaðar.  Skipasmíðar og ferðaþjónusta eru líka mikilvægar greinar.

Flestir íbúa borgarinnar eru katólskir og frönskumælandi.  Borgin hefur tvöfalt skólakerfi, annað fyrir katólska og hitt fyrir mótmælendur, og kennt er á ensku og frönsku.

Mennta- og menningarlíf borgarinnar byggist á Lavalháskólanum og menntastofnunum tengdum honum, hljómleikahöllinni, Grandleikhúsinu, fjölda safna og bókasafna um alla borg.

Helztu sögulegar byggingarnar eru trúalegs eðlis og margar þeirra eru frá 17. öld.  Notre-Dame des Victoires (1688) er við Royaletorgið.  Ursuline-munkaklaustrið, prestaskólinn, Anglicankirkjan (hin fyrsta í Kanada) og katólska basilíkan, þar sem margir biskupar Quebec eru grafnir, eru meðal merkustu bygginga borgarinnar.

Íþróttir eru vinsælar, einkum ísknattleikur, körfubolti, ruðningur, golf og skíðaferðir í Laurentiafjöllum, sem eru aðeins nokkra kílómetra frá borginni.  Mont Sainte-Anne miðstöðin hefur verið vettvangur heimsmeistarakeppna í skíðaíþróttum.  Árlega er haldin þriggja vikna skíðahátíð og fylkissýnig í lok ágúst.  Íbúafjöldinn 1991 var 167.517 í borginni sjálfri en árið 1986 bjuggu 603.267 í Stór-Quebec.