Suomen Tasavalta heitir landið á finnsku.  Það er forsetalýðveldi með fjölflokka þingi.  Finnland er meðal norðlægustu landa heimsins og loftslagið því tengt kuldabeltinu.  Það á norðurlandamæri að Norgegi, í norðvestri að Svíþjóð, að suðvestan er Botníuflói, í suðri er Finnskiflói og Rússland í austri.  Lappland, sem er að mestu norðan heimsskautsbaugs, nær yfir u.þ.b. þriðjung landsins.  Finnland var hluti Svíþjóðar frá 12. öld til 1809, þegar Rússar náðu yfirráðum og gerðu landið að stórhertogadæmi með keisarann sem hertoga.  Finnar lýstu yfir sjálfstæði sínu 6. des. 1917 í kjölfar rússnesku byltingarinnar.  Flatarmál landsins minnkaði um u.þ.b. 10% á fimmta áratugi 20. aldar, þegar Finnar urðu að láta Petsamo af hendi en þar höfðu þeir aðgang að íslausri Íshafsströndinni.  Þeir urðu einnig að sjá af hluta Suðaustur-Karelíuhéraðs til Sovétríkjanna.

Á tímum kalda stríðsins gættu Finnar þess að þræða vandrataðan veg stjórnmálalegs hlutleysis.  Þeir urðu þó að undirrita samning um varnir gegn árásum Þjóðverja eða bandamanna þeirra við Sovétríkin árið 1948.  Þessi samningur féll úr gildi 1991.

Allt frá lokum síðari heimsstyrjaldarinnar hafa Finnar aukið viðskiptaleg og menningarleg tengsl við aðrar þjóðir.  Bandaríkjamenn og Sovétmenn samþykktu aðild Finna að Sameinuðu þjóðunum 1955 og frá sama tíma voru þeir aðilar að Norðurlandaráði.  Finnar komust í heimsfréttirnar, þegar ráðstefnan um öryggi og samvinnu í Evrópu var haldin þar árið 1975.  Finnar hafa aukið samvinnu sína við önnur Norðurlönd, sem hafa sama vinnumarkað og eiga samstarf á ýmsum sviðum efnahagslífsins og vísinda.  Finnar gerðust aðilar að Evrópusambandinu 1995.