Helsinki, höfuðborg Finnlands og héraðsins Uusimaa (Nýjaland), stendur að hluta til á mjög giljóttum granítskaga á norðurströnd Finnskaflóa með fjölda kletta og úthverfa.  Borgin er andleg og veraldleg miðstöð landsins með fjölda mennta- og menningarstofnana og miðstöð iðnaðar, verzlunar og þjónustu.  Þar eru m.a. háskóli, tækniháskóli, tveir verzlunarháskólar og margar vísinda- og menningarstofnanir.  Hún er miðstöð iðnaðar (skipssmíði, vélaframleiðslu, postulínsgerðar og vefnaðar) og stjórnsýslu.  Höfnin í Helsinki er mikilvægasta inn- og útflutningshöfn landsins og í borginni eru stjórnstöðvar flestra stórra fyrirtækja í landinu.  Þar eru haldnar margar tæknisýningar.  Núverandi miðborg var reist á fyrri hluta 19. aldar eftir hugmyndum Johan Albrekt Ehrenström og teikningum berlínska arkitektsins Carl Ludwig Engel (1778-1840) í klassískum keisarastíl.  Stórar og breiðar götur gefa borginni yfirbragð mikils rýmis og ljósar forhliðar húsanna hafa áunnið borginni nafnið „hin hvíta borg norðursins”.  Úthverfi, s.s. görðum prýtt Tapiola, eru til fyrirmyndar.  Fyrstu neðanjarðarbrautir voru teknar í notkun í kringum 1982.

Gustav I Vasa stofnaði borgina 1550 lítið eitt norðaustan núverandi miðborgar við mynni árinnar Vantaanjoki, þar sem hún hverfur í Finnskaflóa.  Tilgangurinn var að keppa við verzlunarborgina Reval (núverandi Tallin).  Kristín drottning lét flytja hana út á skagann Vironniemi árið 1639, þar sem aðstæður voru hagstæðari.  Árið 1748 var bygging varnarmannvirkja hafin á nærliggjandi eyju, Suomenlinna.  Borgarbúar stóðust rússnesku árásarliði ekki snúning árið 1808 og Helsinki var innlimuð í stórfurstadæmið Finnland.  Alexander I, keisari, gerði hana að höfuðborg árið 1812.  C.L. Engel var falið að endurbyggja borgina árið 1916, en þriðjungur hennar hafði brunnið í árásinni 1808.  Árið 1828 var háskólinn fluttur frá Turku (Äbo) til Helsinki.

Eftir að rússneska keisaradæmið hrundi var lýðveldið Finnland stofnað í Helsinki 6. des. 1917.  Þýzkar hersveitir hjálpuðu til við frelsun borgarinnar undan bolsevíkum 1918 og þá varð hún höfuðborg landsins.  Í síðari heimsstyrjöldinni var Helsinki ein fárra höfuðborga Evrópu, sem var ekki hersetin.  Sumarólympíuleikarnir fóru þar fram 1952 og árið 1975 var haldin ráðstefna um öryggi og samvinnu í Evrópu.