Landið er í Eyjaálfu, í Suðvestur-Kyrrahafi, og er ekki talin til Asíulanda.  Næsta nágrannaríki er Indónesía (Irian Jaya-hérað). Heildarflatarmál landsins er 461.691 km².

Landið nær yfir austurhluta eyjarinnar Nýju-Gíneu, Bismarkeyjar (Nýja-Bretland, Nýja-Írland, Nýja-Hannover), Aðmírálseyjar (Manus o.fl.), D'Entrecasteaux eyjar, Louisiade-eyjar, St. Matthiaseyjar (Mussau o.fl.), Woodlark- og Trobriandeyjar og norðurhluta Salómonseyja, Bougainville og Buka.  Auk þessara eyja eru óteljandi smáeyjar, kóralrif og sker. Á Nýju-Gíneu er miðfjalllendi.  Norðan þess eru Sepikdalirnir og strandfjöllin.  Sunnan til er láglendi með fenjum og vötnum.  Aðrar eyjar eru að mestu fjalllendar.

Loftslag: Hitabeltisloftslag með jöfnum hita allt árið og mikilli úrkomu.

Íbúarnir: Langflestir íbúarnir eru Papúar (u.þ.b. 750 þjóðflokkar), malæjar , melanesar og hópar pólínesa.  Þar að auki eru litlir hópar Evrópumanna og kínverja. Heildaríbúafjöldinn var 5,2  milljónir árið 2000. Þeim fjölgar um 2,1% á ári.  Lífslíkur voru rúmlega 50 ár. 
Ólæsi var u.þ.b. 70%.  Vinnuaflið er 2 milljónir og þar af starfa 80% í landbúnaði. Rúmlega 50% íbúanna eru kristin.  Anda-, náttúru- og skurðgoðatrú er algeng meðal frumbyggjanna. Enska er opinbert mál. Alþýðumálin eru Tok Pisin (nýmalæísk pidginenska) og Hiri Motu (lögreglu-motu).

Frumbyggjarnir, Papúar, tala rúmlega 700 mállýzkur. Kínverska er töluð í minnihlutahópi. Papúa, Nýja-Gínea er sjálfstætt ríki síðan 16. september 1975.  Þingbundin konungstjórn. Þingið starfar í einni deild.  Þjóðhöfðinginn er konungur eða drottning Breta.  Fulltrúi hennar í landinu er landstjórinn. Landið er aðili að S.þ. og ýmsum stofnunum þeirra, Brezka samveldinu og unnið er að inngöngu í ASEAN.

Stjórnsýsla: Landinu er skipt í 19 héruð.

Borgir: Höfuðborgin er Port Moresby. Aðrar aðalborgir eru: Lae, Madang, Wewak, Goroka og Rabaul.