Höfuðborgin er Austin og aðrar borgir m.a. Houston, Dallas, San Antonio, Fort worth og El Paso, sem eru allar fjölmennari en höfuðborgin.

Landbúnaður:  Baðmull (mesta framleiðslan í BNA), hrísgrjón, hveiti, sorghum, greipaldin og aðrir ávextir og grænmeti.  Mikil nautgripa-, sauðfjár og fuglarækt. Fiskveiðar eru nokkrar.

Iðnaðurinn er vaxandi:  Efnablöndur, stál, alúmíníum, framleiðsla í tengslum við flug- og geimferðir, olíuhreinsun, vélasmíði, matvæli og málmvinnsla.

Jarðefni:  Jarðolía (mesta olíuframl. í BNA), jarðgas, malbik, brennisteinn, salt, helíum, magnesíum, bróm, leir og kopar.

Ferðaþjónustan er vaxandi (fjöll, hellar og heilsubótarstaðir).

Big Bend þjóðgarðurinn, Dallas, Houston og San Antonio.

Brownsville er allstór borg með sjóbaðstöðum og listamannanýlendu við Rio Grande (landamærin að Mexíkó) í grennd við mynni árinnar við Mexíkóflóa.  Á hægri bakkanum er mexíkóska borgin Matamoros, sem er rúmlega tvöfalt stærri.  Höfn borgarinnar er 9½ km norðaustan hennar.

College Station er meðalstór borg, setur Texas A & M-háskólans (kjarnorkurannsóknir).
Denison er smábær og fæðingarstaður Eisenhowers forseta.

Corpus Christi er iðnaðar- (tæplega ¼ millj.; málmar, jarðolía; kvikfjármarkaður) og hafnarborg við Mexíkóflóa.  Fyrir ströndinni er verndarsvæðið Padre Island National Seashore, á 182 km og allt að 5 km breiðri sand- og malareyju.

Denton er meðalstór borg, setur Norður-Texasháskólans (u.þ.b. 17.000 stúdentar) og kvennaháskóla Texas (u.þ.b. 7000 stúdínur).

Fort Davis National Historic Site er 40 km norðvestan Alpine.  Þar eru rústir mikilvægrar landamærastöðvar frá 1845.

Fredericksburg er smábær, sem þýskir landnemar stofnuðu árið 1846.  Þeir gerðu svokallaðan Meusebachsamning við Chomanche-indíánana á svæðinu.  Sambandskirkjan, upprunalega frá 1847, var endurbyggð og hýsir nú safn.  Fyrrum hótel Nimitz er nú Sjóherssafn og bærinn státar líka af landnemasafni.

Galveston er meðalstór hafnarborg (skipasmíðar) við ytri hluta Galvestonflóa, þar sem hann mætir Mexíkóflóa.  Árið 1900 eyddist borgin næstum alveg í stórflóði og 6000 manns létust.  Sædýrasafnið Sea-Arama og baðstrendur.

Huntsville er lítil borg, sem var heimabær Sam Houston, sem frelsaði Texas undan yfirráðum Mexíkó.  Heimili hans er til sýnis og gröf hans er þar.  Sam Houstonháskólinn (u.þ.b. 11.000 stúdentar).

Johnson City er smáþorp.  Lyndon B. Johnson National Historic Site.  Fæðingarhús og fyrrum bústaður forsetans.

Kingsville er lítil borg.  Skammt frá henni er fyrirmyndarbúgarðurinn King Ranch (333.205 ha), þar sem er stunduð vísindaleg nautgriparækt.

Laredo er meðalstór borg, mikilvæg samgöngumiðstöð tengd Mexíkó við Rio Grande.  Á hinum árbakkanum er mexíkóska borgin Nuevo Laredo, sem er næstum tvöfalt stærri.  Þinghús fyrrum lýðveldisins Rio Grande (1755) og kaktusagarður.

Lubock er stór borg og landbúnaðarmiðstöð (nautgripasýning og nautareiðar í marz).  Fylkisgarðurinn Mackenzie státar af sléttuhundum.

Odessa er stór borg, stundum kölluð „Olíuborgin”.  Fjöldi stórra og smárra gíga myndaðist 11 km suðvestan borgarinnar fyrir u.þ.b. 20.000 árum, þegar loftsteinaregn skall til jarðar.

Palestine er stór borg, þar sem fyrstu tilraunir voru gerðar með háloftabelgi.  Sjóböð við þorpin Port Aransas og Rockport, þar sem er listamannanýlenda.