Opinbert nafn landsins er Lýðveldið Hondúras.  Það er á milli Gvatemala og El Salvador í vestri og Nígaragva í suðri.  Löng norðurströndin snýr að Karíbahafi og stutt suðurströndin að Kyrrahafi. Heildarflatarmálið er 112.088 km² með Bayeyjum í Karíbahafi.  Höfuðborgin er Tegucigalpa (með Comayagüela).  Ólíkt öðrum löndum Mið-Ameríku á það sér aðra jafnmikilvæga borg, San Pedro Sula, sem er þó aðeins hálfdrættingur í íbúafjölda.

Meirihluti íbúanna lifir fremur einangruðu lífi í fjallendinu í miðju landsins.  Þessi búsetuskilyrði gera það e.t.v. að verkum, að þjóðin sker sig úr í samskiptum við aðrar þjóðir Latnesku-Ameríku og rekur aðra stefnu en þau.  Hondúras er, eins og nágrannaríkin, meðal þróunarríkja heimsins.  Efnahagsmálin eru erfið og flókin vegna landslagsins og ofsafenginna veðurskilyrða, s.s. fellibylja (Mitch 1998), sem skilja eftir sig slóð eyðileggingar og dauða.