Landið lýsti yfir sjálfstæði 26. marz 1971 og þar er iðkað lýðræði á sósíalísk-islömskum grunni.  Í landinu ríki herstjórn og stjórnmálaflokkar eru bannaðir.  Bengalaland er aðili að S.þ. og ýmsum sérstofnunum þeirra, Brezka samveldinu, Colomboáætluninni og SARC.  Landinu er skipt í fjögur stjórnsýslusvæði og 19 sýslur, sem skiptast í hreppa (Thanas).

Höfuðborgin er Dhaka (4 m).  Aðrar helztu borgir eru:  Chittagong (1,8 m), Khulna (750þ), Narayanganj (400þ), Mymensingh (250þ), Rajshahi (220þ) og Barisal (190þ).

Lega.  Bangladesh (Bangla Desh = Bengalaland) var Austur-Pakistan til 1971.  Landið nær yfir austurhluta hins gamla Bengalalands, sem er sundurskorinn af fljótum, árfarvegum og skurðum, óshólma Ganges (Padma) og Brahmaputra (Jammu).  Lega landsins:  21°05' og 26°40'N og 88°05' og 92°50'A.  Landið er hér um bil umlukið Indlandi (Vestur-Bengal, Assam, Meghalaya, Tripura og Mizoram), en allrasuðaustast liggur það að Burma.  Sunnan þess er Bengalflói í Indlandshafi.

Landslagið mótast að langmestu af vatnsflaumnum, sem streymir um það, aðallega Ganges (vatnasvið 1.125.000 km²) og Brahmaputra (935.000 km²).  Frjósöm flæðilönd þessara fljóta liggja hæst 50 m yfir sjó en lækkar smám saman til suðurs að óshólmasvæðinu Sundarban, sem er þakið þéttum fenjaskógum, þar sem lifa ýmis villt dýr (tígrar, krókódílar, hirtir).  Í þessum landshluta valda síendurtekin flóð miklu mann- og eignatjóni, breytingum á árfarvegum og miklum tilfærslum jarðvegs og eyja.  Landið smáhækkar til norðvesturs.  Í austri og suðaustri ná skógivaxnar hæðir „Chittagong Hill Tracts” 1200 m hæð yfir sjó.  Þær eru vestustu álmur Himalajafjalla.

Loftslagið er jaðartrópískt með mikilli úrkomu (5000 mm í fjallagrennd og 1500 mm í þurrustu landshlutunum).  Úrkoman er mest á tímabilinu frá maí til oktober (75% ársúrkomunnar).  Hitastigið er svipað allt árið (meðalárshiti 32°C) og loftraki mikill (84-90% á sumrin en 75-82% á veturna).  Á misserisvindatímanum geisa oft tortímandi fellibyljir.  Apríl og september eru heitustu mánuðirnir með 38°C hámarkshita.  Frá nóvember til marz er hitinn 22°C til 27°C á daginn en hann getur farið niður í 10°C á næturnar.

Þetta heitraka loftslag skapar góðar aðstæður fyrir sígrænan gróður, .s.s regnskógana í Chittagonghæðunum, í Madhupur og á strandsvæðunum.

Villidýrafánan hefur látið mikið á sjá.  Nú eru margir dýrastofnar í útrýmingarhættu, s.s. Bengal- eða konungstígrar, fílar, hlébarðar, birnir o.fl.

Búseta.  Bengalaland er meðal þéttbýlustu landa veraldar.  Íbúafjöldinn er nálægt 700 manns á km² og árleg fjölgun er 2,6%.  Bengalar eru 98% þjóðarinnar.  Þeir tala bengali.  Biharar komu frá Biharhéraði í Indlandi árið 1947.  Þeir tala urdu.  Í Chittagonghæðunum eru nokkrir fámennir, mongólskir ættbálkar.

Trúarbrögð.  Langflestir íbúanna eru múslimar (80%; flestir sunnítar).  Hindúatrúa aðhyllast 18%.  Buddhatrú átti sér djúpar rætur í landinu en hún varð undan að láta.  Flestir hinna fáu kristnu eru katólskir.  Fámennir hópar eru andatrúar.

Menntakerfi landsins er í uppbyggingu.  Skólaskylda hefur verið í gildi frá 1972, þótt ekki hafi verið hægt að framkvæma hana enn þá (ólæsi 75%).

Landbúnaður:  Hrísgrjón, sykurreyr, hveiti, hampur, ávextir, tóbak, te.
Iðanaður:  Hamp- og baðmullarvinnsla, matvæli, efnaiðnaður.
Jarðefni:  Gas, kalk, kaólín, salt.
Innflutn.:  Matvæli, vélar, farartæki.
Útflutn.:  Hampur, vefnaðar- og leðurvörur, fiskur, te, froskalappir.
Brúttóþjóðarframleiðsla (1987) 12 milljarðar US$.