Austur-Tímor heitir Timor Lorosa’e á máli innfæddra.  Flatarmálið er 153.870 km².  Íbúarnir, 750.000 árið 2002, eru malæjar og papúar (33% tetum, 12% mambai, 8% kemak, 10% makasai, 8% galoli og 8% tokodede).  Tungumálin, sem töluð eru í landinu, eru portúgalska, tetum og bahasa-indónesíska.  Rúmlega 91% íbúanna eru rómversk-katólskir, 2,6% mótmælendur, 1,7% múslimar, 0,3% hindu og 0,1% búddatrúar.  Helztu framleiðsluvörur landsins eru kaffi, olía, gas, timbur, fiskafurðir, krydd og kakó og helztu viðskiptalöndin eru Ástralía og Portúgal.  Árið 2002 varð Austur-Tímor nýjasta, sjálfstæða ríki heims (20. maí).

Fyrstu forsetakosningar landsins voru haldnar í apríl og sjálfstæðishetjan Xanana Gusmao sigraði með yfirburðum.  Þátttaka í þessum kosningum var áætluð 86%.   Ferðamenn í landinu komast ekki hjá því að upplifa það sem stríðshrjáð en samt mjög fallegt.  Þrátt fyrir allar hörmungar stríðsins og eyðilegginguna í þessari fyrrum portúgölsku nýlendu, eru þar fagrar og góðar baðstrendur, nýlendubæir, falleg fjalllendi og iðjagrænt umhverfi.  Gömul portúgölsk virki eru á víð og dreif og víða eru byggðir uppi í fjöllum, sem portúgalar komu sér upp til að sleppa af og til úr hitamollunni á láglendinu.