SriLanka er suðaustan suðurodda Indlands í Indlandshafi.  Nágrannaríkið er Indland.Milli þess og Sri Lanka er Palksundið (Adamssund).  Heildarflatarmál landsins er 65.610 km².

Náttúrufar:  Umhverfis aðaleyjuna, Ceylon, er fjöldi smáeyja, sem tilheyra Sri Lanka. Á miðri sunnanverðri aðaleyjunni er fjalllendi með láglendi á allar hliðar.  Norðurhlutinn er láglendur.Með ströndum fram eru lón, vötn og rif.

Loftslag:  Monsúnhitabeltisloftslag.  Mesta úrkoman er á sumrin og mest rignir á eyjunni suðvestanverðri.  Hitastig er hátt og loftraki er mikill. Oft er smásvala að finna niðri á láglendinu og við ströndina.

Íbúarnir:  Íbúarnir nefna sig einu nafni Srilanka.  Flestir þeirra eru singalesar (74%) og tamílar  (18%; bæði Ceylontamílar og indverskir tamílar).  Márar, burgar og malæjar eru í minnihluta.  Heildaríbúafjöldi er u.þ.b. 19 milljónir (2003) eða 265 manns á km².  Fjölgunin er 1,7% að meðaltali á ári.  Ólæsi er u.þ.b. 10% og lífslíkur 69 ár.  Vinnuaflið er u.þ.b. 6 milljónir, þar af rúmlega 50%  í landbúnaði. 

Trúarbrögð:  Búddatrú aðhyllast u.þ.b. 70% þjóðarinnar.  Hindúar eru 14% og múslimar eru í miklum minnihluta.

Tungumál:  Aðaltungurnar eru singaleska og tamílska.  Enska er útbreiddust erlendra tungumála.

Ríkið:  Sjálfstæðisyfirlýsing 4. febrúar 1948.  Landið er lýðveldi með forseta sem þjóðhöfðingja síðan 1978.  Löggjafarþingið starfar í einni deild.   Sri Lanka er aðili að S.þ. og ýmsum sérstofnunum þeirra, Brezka samveldinu,

Colomboáætluninni og SARC. Landið hefur sótt um aðild að ASEAN. Landið skiptist í 9 stjórnsýsluhéruð og 24 sýslur.

Borgir:  Höfuðborgin er Colombo.

Aðalstjórnsetur landsins er í Sri Jayewardenepurahverfinu í útjarði borgarinnar.  Aðrar stórar borgir:  Dehiwala-Mount Livinia, Moratuwa, Jaffna og Kandy.