Miðbaugsgínea er ríki á vesturströnd Afríku, 28.051 km² að flatarmáli.  Það nær yfir Río Muni (Mbini) á meginlandinu og fimm eyjar:  Bioko (Fernando Po), Corisco, Stóru-Elobey (Elobey Grande), Litlu-Elobey (Elobey Chico) og Annobón.  Höfuðborgin er Malabo á Bioko-eyju og Bata er stjórnsýslumiðstöðin á meginlandinu.

Meginlandshlutinn er u.þ.b. ferhyrningslagaður og 26.017 km² flatarmáli.  Norðan hans er Kamerún og Gabon fyrir austan og sunnan.  Annabón er eldfjallaeyja, tæplega 18 km², sunnan miðbaugs og suðvestur af Bioko.  Margt hrjáir íbúa þess lands, s.s. hrepparígur, landfræðileg einangrun, viðkvæmt efnahagslíf og skortur á faglærðu fólki, sem er sumpart arfleifð frá nýlendutímanum.  Landið var fyrrum nýlenda Spánar og hét þá Spænska-Gínea.  Það fékk sjálfstæði 12. október 1968.