Máritanía er ríki í Norðvestur-Afríku, 1.030.700 km² að flatarmáli.  Það er nokkurn vegin ferhyrningslagað, u.þ.b. 1500 km frá norðri til suðurs og 1120 km frá austri til vesturs.  Vestur-Sahara er í norðvestri, Alsír í norðaustri, Mali í austri og suðaustri og Senegal í suðvestri.  Atlantshafsströndin milli ósa Senegalárinnar og Hvíthöfðaskagans í norðri er u.þ.b. 720 km löng.  Höfuðborg landsins er Nouakchott. Máritanía myndar landfræðileg tengsl milli Maghrib-svæðisins (Marokkó, Alsír og Túnis) og Senegal í Vestur-Afríku.

Menningarlega myndar landið landamæri milli araba/berba í Norður-Afríku og svæðanna sunnan hádegisbaugs, sem arabar kalla „bilad as-sudan” (land hinna svörtu).  Stór hluti Máritaníu nær yfir vesturhluta Sahara eyðimerkurinnar og stór hluti íbúanna eru hirðingjar.  Auðæfi í jörðu felast aðallega í járngrýti, kopar og gipsi.  Fyrrum stjórnuðu Frakkar landinu, sem fékk sjálfstæði 28. nóvember 1960.  Samkvæmt stjórnarskránni er islam ríkistrú en að öðru leyti á að ríkja trúfrelsi.  Arabíska er þjóðtungan og franska annað tungumál.