Madagaskar var og er landfræðileg og söguleg þversögn, þar eð íbúarnir eru tengdir siðum Afríkubúa en eru malæ-pólínesískir í anda, þótt sáralítil tengsl séu við Indónesíu og fleiri eyjar í Kyrrahafi, þar sem þær eru í u.þ.b. 5000 km fjarlægð.  Flóra og fána landsins eru líka einstök og mjög ólík því, sem gerist á meginlandinu.  Arabar hafa þekkt landið mun lengur en Evrópumenn, sem komu þangað fyrst í kringum 1600.  Höfuðborg landsins, Antananarivo (fyrrum Tananarive), er á hásléttunni á eyjunni miðri.  Vegakerfið er betra á hásléttunni, þar sem flestir íbúarnir hafa notið menntunar og eru kristnir.  Fólkið, sem býr með ströndum fram, hefur ekki notið menntunar og ástundar forn trúarbrögð.