Líbýa er ríki í Norður-Afríku, 1.757.000 km² að flatarmáli og mestur hluti þess er í Sahara eyðimörkinni.  Norðan þess er Miðjarðarhafið, Egyptaland í austri, Súdan í suðaustri, Níger og Chad í suðri og Túnis og Alsír í vestri.  Íbúarnir búa með ströndum fram, þar sem hin opinbera höfuðborg Trípólí er ásamt Banghazi, sem er stjórnsýslumiðstöð landsins. Áður en olía fannst á sjötta áratugi 20. aldar var landið fátækt og framtíðarhorfur ekki góðar, einkum vegna loftslagsáhrifa frá eyðimörkinni.

Íbúarnir byggðu afkomu sína næstum alveg á erlendri aðstoð og innflutningi nauðsynja.  Olían breytti þessu ástandi og landið var fljótlega meðal ríkustu þjóða í Mið-Austurlöndum og Afríku.

Ríkið stjórnar efnahagsmálunum og hefur lagt fé í þróun landbúnaðar og iðnaðar.  Félagsleg þjónusta er m.a. fólgin í menntun og heilsugæzlu.