Helztu landslagseinkenni Kongó eru strandhéruðin, tvær miklar lægðir, hásléttur og þrír fjallshryggir.  Mjó strandlengjan er alllág slétta upp frá Atlantshafinu að Kristalfjöllum.  Stærstur hluti landsins er Kongólægðin (eða Miðlægðin), sem er gríðarstór, öldótt slétta í 515 m hæð yfir sjó að meðaltali.  Lægstu svæði hennar eru í 338 m hæð við Mai-Ndombe-vatnið og hæstu svæðin eru í hæðum Mobavi-Mbongo (700m) í norðurhlutanum.  Þessi lægð kann að hafa verið innhaf en einu stöðuvötnin, sem eftir eru, eru Albert, Edward, Kivu, Tanganyika og Mweru.

Háslétturnar liggja næstum alla leið umhverfis ofangreinda lægð.  Í norðri eru Ubangi-Uele-slétturnar, sem mynda vatnaskil milli Nílar og Kongófljóts.  Slétturnar eru í 900-1200 m hæð yfir sjó.  Þær skilja líka á milli stóru Miðlægðarinnar og sléttusvæðis og vatnasviðs Chad-vatnsins.  Sunnan Miðlægðarinnar liggja háslétturnar að árdölum Lulua- og Lundaánna og hækka smám saman til austurs.  Í suðaustri rísa hryggir Katangasléttnanna (Shaba) yfir allt svæðið.  Þar eru m.a. Kundelungu (1600m), Mitumba (1500m) og Hakansson (1100m).  Katangaslétturnar teygjast að Lukugaánni í norðri og ná m.a. yfir Manikasléttuna og Kibara- og Biafjöll og Marungusléttuna. Norðurhlíðar Angólasléttunnar rísa í suðvestri.  Í vestri er strandsléttan, sem nær yfir hæðir Mayumbe og Kristalfjöll.  Ulafjall (1050m) er hæsti tindur þeirra.

Austurhluti landsins er hæstur og hrjúfastur.  Þar eru fagrir fjallgarðar, sem eru hluti af Austurafríska misgenginu.  Mitumbafjöll teygjast meðfram Vestur-Sigdalnum upp í 2970 m yfir sjó.  Snævi þaktir tindar Ruwenzori-fjallgarðsins milli stöðuvatnanna Albert og Edward á landamærunum að Úganda mynda hæstu staði landsins, s.s. Margheritatind (5119m).  Virungafjöll, norðan Kivu-vatns, mynda eldvirkan hrygg þvert yfir Sigdalinn.

Kongófljótið, þ.m.t. stór hluti af tæplega 3,5 miljóna ferkílómetra lægð hennar, er aðalfljót landsins.  Fljótið á upptök sín á Katangahásléttunni, þar sem það rennur til norðurs og bugðast síðan til suðurs og sker miðbauginn tvisvar á leið sinni í stórum boga.  Neðri hluti fljótsins rennur til suðvesturs og hverfur í Atlantshafið í grennd við Matadi.  Hluti þess rennur um áreyrar og fen og fær til sín vatn úr mörgum stöðuvötnum og öðrum þverám.  Helztu stöðuvötnin eru Mai-Ndombe og Tumba og helztu þverárnar eru Lomami, Aruwimi, Ubangi og allt vatnasvið Kasaifljótsins.  Kongófljótið er einnig tengt Vestur-Sigdalnum um ána Lukuga.