Efnahagur landsins byggist aðallega á olíu, sem er framleidd í Abu Dhabi og Dubayy furstadæmunum.  Búizt er við að birgðir Abu Dhabi endist til loka 21. aldar en í Dubayy munu þær endast skemur.

Olía fannst í Abu Dhabi 1958 og ríkisstjórn landsins á meirihluta í og stjórnar öllum olíufyrirtækjum landsins.  Abu Dhabi Marine Operating Company (ADMA-OPCO), sem Bretar, Frakkar og Japanar eiga líka hlut í, sér um mestan hluta olíuvinnslu og olíuviðskipta. 

Eitthvert stærsta olíulindasvæðið á hafsbotni, Umm ash-Sha’if Al-Bunduq, er undir stjórn þessa fyrirtækis en olíunni er deilt með Qatar.  Japanskt fyrirtæki rekur olíuborpall í Al-Mubarraz og nokkrir aðrir eru í eigu bandarískra fyrirtækja.  Olíulindasvæði á landi eru í umsjá ADCO, sem bandarísk, frönsk, japönsk og brezk fyrirtæki eiga hlut í.  Japanar eiga flest annarra fyrirtækja í olíuiðnaði.

Olíuframleiðsla hófst í Dubayy 1969.  Þar eru neðansjávarsvæði í Haql Fath, Fallah og Rashid.  Furstadæmið á meirihluta í öllum olíufyrirtækjum í landinu.  Ash-Shariqah hóf framleiðslu 1974.  Sex árum síðar fannst svæði, sem gefur að mest gas af sér.  Árið 1984 hófst dæling úr neðansjávarlindum í Ra’s al-Khaymah í Persaflóa.  Dubayy framleiðir u.þ.b. þriðjung alls eldsneytis í S.a. furstadæmunum.

Landbúnaður og fiskveiðar.  Mest er um landbúnað í furstadæmunum Ra’s al-Khaymah, Al-Fujayrah og í ‘Ajman og Al-‘Ayn hefur hann aukizt talsvert vegna áveitna í tengslum við nýjar borholur.  Aðaluppskeran er döðlur, tómatar, gúrkur og ábergínur.  S.a. furstadæmin eru næstum sjálfum sér næg með framleiðslu ávaxta og grænmetis.  Mestur hluti matvæla er fluttur inn, s.s. korn, en framleiðsla eggja, kjúklinga, fisks og mjólkurafurða nægir innanlandsþörfinni.  Rannsóknarstofnun landbúnaðarins í Al-‘Ayn vinnur stöðugt að umbótum í ræktun nytjajurta við eyðimerkurskilyrði.  Lunginn úr fiskveiðiflotanum gerir út frá Umm al-Qaywayn.

Iðnaður.  S.a. furstadæmin hafa stefnt að fjölbreytni í efnahagslífinu til að komast hjá því að reiða sig eingöngu á olíuna.  Í landinu er stór hluti gasbirgða heimsins og Abu Dhabi notar gas innanlands og flytur mikið út.  Í ar-Ruways er stór efnaverksmiðja (225 km suðvestan Abu Dhabi-borg) með olíuhreinsunarstöð, gasstöð og ammoníak- og úreaverskmiðjum.  Fjármunum Dubayy hefur m.a. verið varið til byggingar slippa og viðskiptamiðstöðvar.  Flugvöllurinn var stækkaður og mörg hótel hafa verið byggð.  Fríverzlunarsvæðið í Mina’ Jabal ‘Ali, 32 km suðvestan Dubayy-borgar var þróað á níunda áratugnum og hefur laðað að sér erlend iðnfyrirtæki, sem framleiða vörur til útflutnings.  Ash-Shariqah hefur reist sementsverksmiðju, plastpípuverksmiðju og málningarverksmiðjur.

Fjármál og viðskipti.  Seðlabanki S.a. furstadæmanna var stofnaður 1980.  Helmingur tekna Dubayy og Abu Dhabi rennur þangað.  Bankinn gefur líka út gjaldmiðilinn UAE dirham.  Bankakerfið byggist á bönkum, sem sinna verzluninni, fjárfestingum, þróunarverkefnum, erlendum og innlendum viðskiptum o.fl.  Árið 1991 varð Alþjóðlegi kredit- og verzlunarbanki landsins í eigu konungsfjölskyldunnar að hætta starfsemi vegna spillingar og fimm árum síðar var fríverzlunarsvæðinu komið á fót.

Verzlun og viðskipti hafa löngum verið mikilvæg starfsemi í landinu, einkum í Dugayy og ash-Shariqah.  Tekjur Dubayy byggðust mjög á smygli gulls og munaðarvarnings til Indlands og Pakistan.  Hafnarborgin Rashid hefur stóra, nútímalega höfn með stórri skipasmíðastöð.  Höfnin í ash-Shariqah er minni.

Mestur hluti útflutningsins er olía, sem er flutt til Japan, BNA og Vestur-Evrópu.  Meðal þess, sem er aðallega flutt inn er vélbúnaður og farartæki, hráefni, matvæli og kvikfé á fæti, eldsneyti, efnavara og málmgrýti.  Aðalviðskiptalöndin eru Japan, Vestur-Evrópa, BNA, Ástralía og Singpúr.  Mikill hluti endurútflutningsvöru fer til nágrannalandanna.

Samgöngur.  Vegakerfi landsins, sem hefur þróast frá því á sjöunda og áttunda áratugnum, er mjög gott og með bundnu slitlagi.  Nú er hægt að aka milli Dubayy-borgar og Dayrah um göng og brú.  Borgirnar Abu Dhabi, Dubayy, ash-Shariqah, Ra’s al-Khaymah og Al-Fujayrah hafa millilandaflugvelli.  Sjötti flugvöllurinn við Al-‘Ayn var opnaður á níunda áratugnum.