Eistland er láglend slétta með fjölda vatnsfalla og stöðuvatna.  Meðalhæð landsins er 50 m.y.s. og hæsti punkturinn nær 318 m.  Mýrlendi þekur rúmlega 20% landsins og stöðuvötn og lón u.þ.b. 5%.  Stærstu vötnin eru Peipus við austurlandamærin og Vorts-Jarv í miðsuðurhlutanum.  Loftslagið er milt vegna áhrifa sjávar, þótt áhrifa meginlandsloftslagsins gæti, þegar fjær dregur sjó.  Úrkoma er tempruð, að meðaltali 500-700 mm á ári.

Aflangar hæðir frá norðri til suðurs eru leifar frá ísöldinni eins og grettistökin í suður- og suðausturhlutunum.  Strönd landsins er u.þ.b. 1160 km löng og u.þ.b. fjórðungur landsins er skógi vaxinn.  Mest ber á furu, birki og ösp.  Meðal algengra, villtra dýra eru elgir, dádýr og villisvín.  Nokkrar tegundir eru friðaðar, s.s. bjór, rauð dádýr og orri.