Luxemburg skiptist í 3 sýslur og 12 kantónur.  Landið er 2.586 km² og íbúafjöldinn u.þ.b. 430.000 (2002).  Samkvæmt stjórnarskránni frá 1868 er Lúxemburg erfðaeinveldi undir stjórn stórhertoga (frá 1964 Jean af Nassauætt, f. 1921).  Ein þingdeild með 59 fulltrúa, sem kosnir eru til 5 ára í senn.  Ríkisráð með 21 fulltrúa, sem stórhertoginn velur til ævilangrar setu, er ráðgefandi fyrir stjórnina.  Hertoginn tilnefnir a.m.k. 3 ráðherra og einn þeirra er forsætisráðherrann.  Þingmenn eru 60.  Stærstu stjórmálaflokkarnir eru Kristilegi flokkurinn (22 þingsæti 1996), Verkamannaflokkurinn (18) og Lýðræðisflokkurinn (11).  Enginn einn flokkur hefur náð meirihluta á þingi eftir síðari heimsstyrjöld, þannig að samsteypustjórnir tveggja og þriggja flokka hafa farið með völd.  Það hefur ekki skorizt í odda með ríkisstjórnum og verkalýðsfélögum í hálfa öld.  Verkföll eru því óþekkt fyrirbæri í landinu.

Innfæddir Lúxemburgarar eru af þýzku bergi brotnir og flestir katólskir Móselfrankar.  U.þ.b. fjórðungur íbúanna er aðfluttur, Ítalar, Portúgalar (40.000), Frakkar, Þjóðverjar, Belgar, Spánverjar og Íslendingar (400).  Vinnuaflsskorts hefur lengi gætt í landinu, þannig að fólk af ofangreindu þjóðerni hefur setzt þar að og u.þ.b. 40.000 manns koma þangað til vinnu frá nágrannaríkjunum á hverjum degi.  Ríkismál eru þýzka og franska, en almennt talar fólk miðfrankneska mállýzku, sem nefnis Letzeburgisch.