Parque de los Martires er vinsæll skrúðgarður milli Castillo de la Punta og Castillo de la Real Fuerza.  Í norðvesturhorni hans er heiðursgrafhýsi stúdenta, sem voru skotnir 1871.  Þar er líka riddarastytta af Máximo Gómez.  Aðeins sunnar er Skjalasafnið, þar sem hægt er að grafa niður að rótum kúbverskrar tónlistar.

Museo de la Revolución, fyrrum forsetahöll, er suðvestan Mártires-skrúðgarðsins.  Þar er að finna mikið skjala- og bókasafn um síðari tíma sögu landsins.  Rétt þar hjá er endursmíði af snekkjunni Granma, sem sigldi á frá Mexíkó til Kúbu 1956.

Palacio de Bellas Artes er í grennd við Byltingarsafnið.  Þar eru til sýnis verk eftir gamla og nýja meistara.  Athyglisverðust eru verk eftir kúbverska málara frá 18., 19. og 20. öldum.

Parque Central er vinsæll skrúðgarður með styttu af frelsishetjunni José Martí.

Lorcaleikhúsið (1838) er við Parque Central vestanverðan.  Byggingin er prýdd fjórum hornturnum.  Þar eiga hæli hinn heimsfrægi kúbverski þjóðarballett og ríkisóperan.

Capitolo (fyrrum þinghús; 1929) var byggt eftir bandarískri fyrirmynd og stendur við einu skrúðgötu borgarinnar, Prado.  Húsið er allt úr marmara að innanverðu.  Það hýsir nú Academia de Ciencias (kúbversku vísindaakademíuna) og Felipe Poey-safnið (náttúrufræðisafn; jurta- og dýralíf Karíbasvæðisins; eftirlíking af Punta del Este-hellunum, sem frumbyggjarnir bjuggu í áður en Kólumbus kom til skjalanna).  Einnig er að finna stjörnuathugunarstöð í byggingunni.

Plaza de la Fraternidad (Bræðralagstorgið) er sunnan við Capitolo.  þar er brunnur úr hvítum marmara frá 1837.  Nafn torgsins er dregið af samamerískri ráðstefnu, sem haldin var í Havana árið 1928.  Sunnan torgsins er Martíleikhúsið, sem reist var á 19.öld.

Paseo José Martí (Prado).  Lagning þessarar breiðgötu var hafin árið 1770.  Hún liggur á milli Capitolo og Castillo de la Punta.  Hún er prýdd trjám, blómaskreytingum og ljónastyttum og var eitt sinn lúxusverzlunargata.

Malecón er fjölakreina gata meðfram ströndinni til vesturs frá Castillo de la Punta.  Kúbverski verkfræðingurinn Albear sá um lagningu hennar og lauk verkinu í byrjun 20.aldar.  Brimúði berst oft yfir götuna.  Við Malecón stendur sjúkrahús (hæsta bygging borgarinnar sem stendur) og Maceo garðurinn, þar sem er riddarastytta af frelsishetjunni Maceo.  Havannabúar flykkjast niður á ströndina um helgar til að synda, sóla sig og slappa af, þrátt fyrir að ströndin meðfram götunni sé ekki ætluð baðgestum..

Avenida Caliano byrjar við Deauville hótelið.  Hún er ein aðalverzlunargata borgarinnar.

VEDADO
borgarhlutinn er vestan miðborgarinnar.  Fyrir seinni heimsstyrjöldina var hann íbúðarhverfi efnaða fólksins en varð að skrifstofu- og viðskiptahverfi.  Göturnar eru skipulagðar að bandarískri fyrirmynd (með Miami sem fyrirmynd).  Síðla á sjötta áratugnum réðu þar helzt ríkjum glæpamenn, viðskiptajöfrar, pókerspilarar og vændiskonur.

Calle 23.  við Hótel Nacional er líflegasta verzlunargata Havana.  Neðri hluti hennar er kallaður La Rampa.  Þar standa í röð nokkur hótel, ráðuneyti og skrifstofur ýmissa flugfélaga.  Þar er líka hótelið Habana Libre (hét áður Habana Hilton), aðalskrifstofa ferðaskrifstofu ríkisins Cubatur og ríkisrekna útvarpsstöðin.

Háskólinn var stofnaður 1928 og er á Arostequi-hæðinni.  Þetta er heimavistarháskóli í nýklassískum byggingum.  Minnismerkið við þrepin upp að aðalinnganginum inniheldur öskuker Julio Antonio Mella, stúdentaleiðtoga, sem Machado-stjórnin lét myrða.  Austan háskólans er Napoleónicosafnið með áhugaverðum gripum frá Napóleontímanum.  Montanesafnið er líka á skólalóðinni.  Þar er að finna mjög áhugaverðar minjar frá dögum frumbyggjanna.

Castillo del Principe-virkið, sem Spánverjar reistu, stendur á hól ofan við háskólalóðina.

Museo del Arte Decorativo er við Calle 17.  Þar er að finna fallegar skreytingar frá 18. og 19.öld.

José Martí-garðurinn er líka við Malecón.  Vestantil í honum er minnismerki um Calixto Garcia hershöfðingja og Ameríkuhúsið (Casa de las Américas) með fallegu málverkasafni.

La Chorrera er lítil vík aðeins vestar.  Hún er vöktuð úr varðskýli.  Í hana rennur áin Almendares og við hana stendur stórhótelið 'Habana Riviera'.

Almendares-garðurinn er fallegur og liggur aðeins sunnar.

**Byltingartorgið (Plaza de la Revolución) er fyrir sunnan og neðan Castillo Principe.  Á því stendur risavaxið minnismerki um José Martí.  Það er stjörnulaga, 105 m há súla, sem kúbverski listamaðurinn Sicre er höfundur að.  Umhverfis torgið standa stjórnarbyggingar Kastróstjórnarinnar s.s. stjórnarhöllin, bygging miðstjórnar Kommúnistaflokks Kúbu, Þjóðarbókhlaðan (rúmlega hálf milljón bóka),  Þjóðleikhúsið, varnarmála-, innanríkis, samgöngu-, byggingarmála- og póst- og símamálaráðuneytin.  Í hinu síðastnefnda er frímerkjasafn.  Einnig að þar COMECON-höllin.

Á torginu eru haldnar allar mikilsverðustu hátíðir, s.s. 1. maí hátíðin og hinar löngu ræður foringjans (Máximo Lider).

Nokkrum hundruðum metrum austar er íþróttaleikvangurinn Estadio Latinoamericano, þar sem fara oft fram mikilvægar íþróttakeppnir.

Cementerio Colón (kirkjugarðurinn) er ½ km vestan torgsins.  Hann er prýddur aragrúa frafhýsa og grafsteina úr marmara og er hinn athyglisverðasti sinnar tegundar á Kúbu.

Cerro Palatino.  Ein skrautgatan í viðbót, Avenida Ranco Boyeros, prýdd upplýstum gosbrunnum, liggur til suðvesturs í gegnum Cerro Palatino-borgarhlutann og út á flugvöll.  Við borgarmörkin er grasa- og dýragarður.

Nacional de Cuba Hotel og Riviera Hotel voru bæði byggð upp af bandarísku mafíunni.  Þar voru spilavíti.

MIRAMAR
Tvenn göng liggja undir ána Almendares inn í borgarhlutann Miramar, þar sem eru eingöngu einbýlishús, sem flestir eigendurnir yfirgáfu eftir byltinguna.  Þar eru nú dýrar verzlanir, sendiráð og þar búa erlendir sendiherrar, t.d. við Quinta Avenida.

Sædýrasafnið í Miramar var byggt samkvæmt ströngustu kröfum.  Það er aðeins opið fyrir hádegi.

Mariano-hverfið er vestast í borginni.  Það var auðmannahverfi fyrir byltinguna. Mörg húsanna þar tók stjórnin til sinna þarfa, þegar íbúarnir voru flúnir og hún nýtir íþróttaaðstöðuna, sem var þar fyrir.

Tropicana er einstakur næturklúbbur, sem á engan sinn líka í öllu Karíbahafinu.  Þangað flykkist skemmtanaþyrst fólk alls staðar að úr heiminum.

Ciudad Libertad er skólabær, sem hefur byggzt upp síðan 1970 á svæði, sem var áður herflugvöllur.

Palacio de Congresos er ráðstefnumiðstöð höfuðborgarinnar.  Hún var byggð í tilefni af ráðstefnu óháðra ríkja í Havana og var tilbúin 1979.

Listaskólinn (Escuela de Arte) stendur á svæði, sem tilheyrði klúbbi ríka fólksins áður fyrr.  Ricardo Porro, arkitekt, skipulagði þar fjölda misstórra kúpulbygginga með yfirbyggðum tengigöngum.

Barlovento er miðstöð vatnaíþrótta aðeins vestar.  Þar er nýgerð *smábátahöfn, sem kennd er við Hemingway.  Þar eru legur fyrir 100 snekkjur og skútur.  Í hótelinu, El Viejo y el Mar, hittist fólk alls staðar að úr heiminu og þar er fjöldi verzlana og veitingahúsa.

Santa Fé og Jaimanitas eru falleg lítil fiskiþorp í grennd við Barlovento.

Höfnin.  Meðfram höfninni eru raðir vöruhúsa og lengra til suðausturs er iðnaðarhverfið Luyano.

Castillo de Atarés (18.öld).  Þetta virki stendur sunnan aðalbrautarstöðvarinnar. Það var byggt til varnar vesturhluta hafnarinnar.

Safn innanríkisráðuneytisins (Museo del Ministerio de Interior) hýsir muni og minjar frá köldustu tímum kalda stríðsins milli Kúbu og BNA.  Þar er m.a. að finna alls konar tól og tæki, sem átti að nota til að koma Kastró fyrir kattarnef (sprengjuvindlar, sápudiskar með plastsprengjum o.fl.).