Íbúafjöldinn er 8,3 milljónir (>12 milljónir með útborgum; 1998).  Höfuðborgin er á suðurhluta austurstrandar Honshu.  Þrjár ár renna um höfuðborgarsvæðið, Sumida, Arakawa og Tama, unz þær hverfa í Kyrrahafið í Tókíóflóa.  Tókíó, Kawasaki og Yokohama mynda stærsta iðnaðarsvæði landsins, Keihin.  Tókíó og umhverfi er meðal þriggja stærstu þéttbýla heims með 25 milljónir íbúa (Mexico City og Shanghai eru hin þéttbýlin).

Mælt er með **Keisarahöllinni stórkostlegu í miðborginni sem upphafsstað skoðunarferða um borgina.  Lítið sést af höllinni sjálfri vegna hárra múra og virkisgrafa umhverfis hana.  Hefjist skoðunarferðin frá Hallarhótelinu (Palace Hotel), austan hallarinnar, er bezt að reyna að fá yfirsýn yfir hallarsvæðið af þaki hótelsins.  Hallarsvæðið er aðeins opið almenningi tvisvar á ári, 2. janúar og á afmælisdegi keisarans.  Erlendir gestir geta fengið að skoða það á öðrum tímum með því að falast eftir því við hinn keisaralega umsjónarmann.  JNTO annast milligöngu.

Við suðausturhorn hallarsvæðisins er stórt torg, þar sem japanskir gestir safnast saman.  Þegar inn er komið veitir hin merkilega Hijubashibrú aðgang að austurhluta garðsins síðan 1968, en einnig eru inngangar að vestan- og norðanverðu.  Garðurinn er opinn á þriðjudögum, miðvikudögum, laugardögum og sunnudögum auk lögbundinna frídaga kl. 09:00-16:00 og eftir kl. 15:00 er engum hleypt inn.  Það borgar sig að ganga um hallargarðinn og kíkja inn í borgarhverfin umhverfis hann til að fá fyrstu hugmyndirnar um borgina.

Frá norðurhliðinu í austurhluta garðsins liggur vel við að kíkja á Kandahverfið skammt norðar.  Þar eru margar áhugaverðar bókaverzlanir og Meiji-háskólinn.  Sé haldið áfram sólarsinnis frá austurgarðinum, kemur Kitanomaru-garðurinn í ljós beint norður af hallargarðinum.  Þar eru nýlistasafn þjóðarinnar, vísindasafnið og sýningar og uppákomuhöllin Nippon Budokan, sem er lýsandi dæmi um hagnýta byggingarlist.  Við Chidorigafuchiskurðinn er hægt að leigja árabáta til siglinga á virkisgröfunum.

U.þ.b. 800 m norðan keisarahallarinnar er *Korakuenlystigarðurinn, einn klassískasti garðurinn í borginni.  Auðvelt er að komast þangað með neðanjarðarlest frá Ginza-stöðinni og stigið af henni í Korakuen-stöðinni.  Við garðinn stendur Kodokanjúdóhöllin.

Skammt frá norðvesturhorni keisarahallarinnar er Yasukunihofið, fagurt tákn Shintotrúarinnar og minnismerki þeirra, sem fallið hafa í styrjöldum.  Inngangur í það er um stærstu hlið (Torii) landsins.  Annað er úr graníti og hitt úr bronzi.

Meðfram vesturhluta keisarahallarinnar er breiðasti skurðurinn með mikinn múr á öðrum bakkanum.  Í grennd við suðvesturhorn hallargarðsins er áberandi, nýtízkulegt leikhús og skammt sunnar er þinghúsið, granítbygging frá 1936.  Hægt er að fá að skoða það, þegar þingið er ekki saman komið, ef haft er samband við umsjónarmenn þess fyrirfram.  Vilji fólk skoða það á meðan þingið er að störfum, verður að fá sérstakt aðgangskort hjá einhverjum þingmannanna eða sendiráði sínu.

Sunnan við keisarahöllina er fjöldi stjórnarbygginga auk Hibiyagarðsins og síðan tekur við Ginza-hverfið litlu austar.  Þangað er haldið eftir götunni norðan garðsins undir járnbrautina.