Mikilvægasta hafskipahöfn Japans er á vesturströnd Tokyo-flóa, 25 km sunnan Tókíó, í Yokohama.  Þangað ekur fólk með Yokosuka-lest JNR frá aðalbrautarstöð Tókíó.  Báðar borgirnar hafa stækkað svo mjög, að mörkin á milli þeirra eru orðin ósýnileg og firnastórt, samfellt þéttbýli hefur myndazt.  Íbúafjöldinn í Yokohama sjálfri er u.þ.b. 3 milljónir.  Miðborgin er lýsandi dæmi um velheppnaðs borgarskipu-lags.  Í næsta nágrenni hennar eru hverfi, sem útlendingar byggðu á 19.öld.  Meðal áhugaverðustu skoðunarstaða Yokohama er útlendingakirkjugarðurinn, Yamashita-garðurinn með góðu útsýni yfir höfnina, garðurinn *Sankei-en (fallegur garður með fjölda sögulegra bygginga) og aðalverzlunargatan, Isezaki-cho.

Yokosuka-lestirnar aka áfram 40 km til Kamakura við Sagamiflóa (180 þ. íb.), sem var höfuðborg landsins á tímum Minamoto-herstjóranna 1185-1333.  Strendurnar á milli Kamakura og Enoshima eru mjög vinsælar og fjölsóttar á sumrin.

Skoðunarverðast í hinni rólegu borg Kamakura er **Stóra búddalíkneskið (Daibutsu; 11,4 m há bronzstytta) í suðvesturhlutanum, nærliggjandi Hase-Kannon-hofið, *Tsurugaoka-Hachimangu-hofið (norðaustan brautarstöðvarinnar), búddahofin Engakuji, Kenchoji, Gokurakuji, nýlistasafnið og *borgarsafnið (Kamakura Kokuhokan; list frá Kamakura- og Muromachi-tímunum).  Nú á dögum er Kamakura viðurkennd miðstöð lista og mennta.

U.þ.b. 25 mínútna siglingu frá Kamakura er eyjan Enoshima (600 m löng brú tengir hana við meginlandið frá þorpinu Katase; Odakyu-lestin ekur þangað alla leið frá Shinjukustöðinni í Tokyo).  Á eyjunni, sem er mjög vinsæll staður meðal Japana sjálfra, er Enoshima-hofið, sem var byggt árið 1182.  Upp að því liggja 300 steinþrep.

Sunnan Yokohama og Kamakura gnæfir Miura-skaginn upp úr Kyrrahafinu (JNR-Yokosuka-lestin frá aðalbrautarstöðinni í Tókíó og Keihin-Kyuko-lestinni frá Shingagawa-stöðinni).  Því miður eru strendur skagans talsvert mengaðar vegna nálægðar hins risavaxna þéttbýlis, þannig að ráðlegt er að nota frekar strendur Izuskagans vestar.

Yokosuka (við YNR-brautina; 420 þ. íb.) er aðalborgin á Miura-skaganum.  Þar er lífleg fiskibátahöfn (líka sjóherstöð Bandaríkjamanna), sem gott er að nota sem upphafsstað til skoðunarferða.  Þar liggur við stjóra flaggskip Togo aðmíráls, Mikasa, sem hleypt var af stokkunum árið 1900 og var notað í rússnesk-japanska stríðinu og lagt árið 1923.  Það var opnað sem safnskip árið 1961.

JNR-lestirnar fara ekki lengra en til Kurihama, annars fiskibæjar, með góðum baðströndum.  Þar er minnismerki úr steini um bandaríska flotaforingjann Perry.

Handan Tókíóflóans er mun stærri skagi, Boso, sem kallaður er forðabúr höfuðborgarinnar vegna landbúnaðar- og sjávarafurðaframleiðslunnar þar.  Járnbrautarsamgöngur eru á milli aðalbrautarstöðvarinnar í Tokyo og Chiba, sem er góð miðstöð til skoðunarferða um skagann.

Umhverfis Chiba er rekinn mikill landbúnaður og þar er hægt að kynnast Japan fortíðarinnar.  Skógi vaxnir, keilulaga hólar, fögur strandlengjan og fjöldi skrína líkjast helzt ævintýralegri pennateikningu.  Vegna þess, hve langan tíma tekur að aka með troðfullum lestum til þessa landshluta frá Tókíó, eru baðstrendurnar yfirleitt ekki eins fjölsóttar og hinar nærtækari.

Innkaup:
Meðal þess, sem gaman er að gera í Japan, er að fara í verzlanir.  Vöruúrval er mikið og gæði mikil, enda er dýrt að verzla.  Stórverzlanir stórborganna eru þess virði að skoða nánar, þótt ekkert sé keypt.  Þær gefa hugmyndir um Japan nútímans.  Aðal-stórverzlanir Tokyo eru í hverfunum 'Ginza', 'Nihonbashi' og 'Shinjuku'.  Auk þeirra er fjöldi stórra og smárra sérverzlana.

Bókabúðin 'Maruzen' í samnefndri stórverzlun (6, Tori-Nichome, Nihonbashi, Tokyo) býður mikið úrval bóka um Japan.  Sama er að segja um bókabúðirnar 'Kinokuniya' í 'Shinjuku' og 'Jena' í 'Ginza'.

Útlendingum býðst mikið úrval vara án virðisaukaskatts.  Helzt er mælt með skartgripum (perlur, eðalmálmar, skjaldbökuskeljar, kórallar, bernstein, fílabein, Cloisonné-gripir), pelsum, veiðivopnum, tölvuleikjum, ljósmyndavörum (verðlag líkt og í Hongkong) og úrum.  Þegar keyptir eru elektrónísk tæki, er nauðsynlegt að ganga úr skugga um, að hægt sé að fá þjónustu tengda þeim í Evrópu.  Til þess að fá endurgreiðslueyðublað vegna virðisaukaskatts þarf að framvísa vegabréfi í verzlunum og sýna það ásamt vörunum við brottför, t.d. á flugvelli, þar sem endurgreiðslan fer fram.  Skatturinn nemur milli 5% og 40%.

Mælt er með kaupum á japönskum listmunum, þótt þeir séu dýrir.  Þá er einkum um að ræða keramíkvörur, muni úr tré (líka lakkaðir), dúkkur, batík o.fl.  Í slíkum viðskiptum er algengt að prútta um verð.  Silkivörur eru í hágæðaflokki.  Gott dæmi um fatnað úr silki er lindi fyrir kvenmorgunsloppa, sem kemur e.t.v. ekki að gagni sem slíkur, heldur sem fallegt veggskraut.

Talið er, að beztu kjörin við listmunainnkaup fáist í Kíótó.  Gamlar hefðir við gerð listmuna eru í hávegum hafðar í þessari fyrrum höfuðborg landsins, s.s. silkigerð og vinnsla lakkaðra trémuna, einkum svartgylltra og rauðgylltra í stíl 'Tokugawa'-tímans.  Einnig eru framleiddar dúkkur og keramíkvörur.  Flestar verzlanir með list-muni er að finna við gatnamót 'Kawaramachi-dori' og 'Shijo-dori' og götuna 'Shimonzen-dori'.  Keramíkvörur fást við 'Gojo-dori'.  Auk þessa fást alls konar málverk, tréprentanir, lampar o.fl.

Veitingahús í Tókíó:
Furusato er í grennd við Shibuyaki.  Það er í rúmlega þriggja alda gömlu timburhúsi og býður hefðbundina Tokyo-matargerð og eftir kl. 19:00 hefst japönsk tónlist og dansar.

'Nadaman' í Imperial hótelinu býður óvenjulega japanska rétti líkt og í New Otani hótelinu.

'Inakaya' (bæði í 'Roppongi' og 'Akasaka') býður rétti, sem gesturinn hefur valið hráefni í og kokkarnir matreiða þau á hnjánum á bak við afgreiðsluborðið.  Réttirnir eru framreiddir á löngum trébökkum.

'Edogin' við fiskmarkaðinn er áhugaverður 'Sushi'-staður.  Þar velur gesturinn fiskinn lifandi úr steinkerjum.

''Ten'Ichi' (í 'Ginza', 'Akasa' og 'Shinjuku') eru rómuðastu 'Tempura'-veitinga-húsin.

'Inagiku' er í grennd við 'Kayabacho' - neðanjarðarbrautarstöðina.

'Tonki's' í grennd við 'Meguro'-brautarstöðina býður 'Tonakatsu', svínakótel-lettur.


'Maxim's' er vestrænn veitingastaður í Sony-byggingunni og

'La Promerade' við 'Hibiya'-garðinn.  Bæði frönsk.

'The Swiss Inn' er í Roppongi.  Svissneskt.

'Anna Miller's' er í 'Asaka'.

'The Lamp Light' er í 'Minami-Aoyama' og Viktoríustöðinni í 'Roppongi'.  Tvö síðastnefndu eru bandarísk.

Þar að auki er fjöldi alþjóðlegra veitingahúsa, s.s. ítalskra, indverskra, kínverskra o.fl.