Á  BÖKKUM  JAMNA.  Á milli víggirts gamla borgarhlutans og Nýju-Delí eru rústir Ferozabad (Ferozeshah Kotla), borgarinnar, sem Shah Tughluq (1351-1388) stofnaði.  Ashoka-súlan (3. öld f.Kr.) er ein fjölmargra marksteina Ashoka hins mikla.  Feroze Shah lét flytja þá hingað til að fegra borgina.

Austar, handan Indlandshliðsins, eru rústir Purana Qila (Gamla virki) frá valdatíma Humayuns, annars mógúls á fyrri hluta 16. aldar.  Við hliðina á rústunum sunnanverðum er dýragarðurinn (m.a. hvít tígrisdýr).

Einum km suðaustar er minnismerki Humayun (†1556), sem lét reisa Akbar fyrir föður sinn (lokið 1572).  Þetta grafhýsi varð síðar fyrirmyndin að Taj Mahal í Agra.  Umhverfis minnismerkið eru fallegir garðar, þar sem voru fyrrum gosbrunnar í mógúlstíl.

UMHVERFI  DELÍ.  Skammt sunnan Nýju-Delí, austan við Afríkubreiðstræti (milli Harsukh Marg í norðri og Palam Road í suðri), er stórt grænt svæði með íþróttavöllum (Dehli Lawn Tennis Stadium), villidýragarði, rósagarði og lautaferðastöðum.  Í miðju þessa svæðis er 'Hauz Khas', grafhýsi og minnismerki Feroze Shah.

**Qutab Minar (12 km suðvestan miðborgar Nýju-Delí í grennd við gamla virkisins Lalkot, skammt norðan bæjarins Mehrauli) byggðu islömsku sigurvegararnir (1206-1238) sem mínarettu og sigurturn.  Það er meðal fegurstu minjum byggingarsögu heimsins og mjög vel varðveitt.  Hinn 72,54 m hái turn er fimm hæða og uppmjór.  Þrjár fyrstu hæðirnar eru úr rauðum sandsteini en hinar úr hvítum marmara með millilögum úr sandsteini.  Utan um hverja hæð eru fagurlega skreyttar svalir.  Gestum er aðeins leyft að fara við þriðja mann upp í turninn til að fyrirbyggja sjálfsmorð.  *Útsýnið úr turn-inum er frábært.  Qutab Minar er miðja borgar Raj Pithuras, Raj Pithomra.  Vitnisburður um orrusturnar, sem hann háði, sjást meðfram vegunum frá Nýju-Delí.

Í rústum nærliggjandi mosku er merkileg, 7 m há járnsúla (líklega frá 4. öld).  Hún hefur verið steypt í einu lagi úr smíðajárni, sem ryðgar ekki.

U.þ.b. 500 m vestan Qutab Minar er hið fagra, átthyrnda grafhýsi Adham Khan.  Hálfbróðir hans, Akbar hinn mikli, skipaði svo fyrir, að hann skyldi myrtur, og honum var hrint fram af svölum hallar í Agra.

Rúmum 5 km vestan Qutab Minar er hið athyglisverða grafhýsi Mahmuds, sonar Iltumish.  Hindúskir iðnverkamenn byggðu það í islömskum stíl árið 1229.

Átta km austan Qutab Minar, uppi á flötum kletti, eru hinir gömlu borgarmúrar Tughluqabad.  Ghiyas-ud-Din Tughluq (†1325), forfaðir Tughluq höfðingjaættarinnar, sem ríkti 1320-1413, lét reisa þá.  Þegar völd þessarar ættar voru mest ríkti hún yfir svæðinu milli Madurai í suðri til Kasmír í norðri.  Fimmtán árum eftir stofnun borgarinnar gáfust menn upp á byggingu hennar.  Borgarmyndin er hálfur sexhyrningur með 6 km ummáli.  Hallandi múrarnir með gríðarmiklum hringturnum og þrettán hliðum eru úr reglulegum lögum af granítsteinum.  Hinir stærstu eru nærri 4 m langir og 1 m þykkir.  Innan múranna er allt í rústum.  Sunnan þeirra, handan götunnar, er hið stóra og virkislagaða grafhýsi Ghiyas-ud-Din Tughluq, sem hann lét reisa sér meðan hann var enn þá á lífi.  Hvíti marmarakúpullinn er 10,5 m í þvermál.

Frá grafhýsinu er ekki langt að hringleikahúsinu 'Suraj Kund' (11.öld), sem mun vera elzta byggingarlistarverk Delí.  Uppistöðulónin, sem er líka frá 11. öld, er vinsæll útivistarstaður.