Djibouti hefur hernaðarlega mikilvæga legu á Horn í Afríku við Mandebsund, sem skilur Rauðahaf frá Adenflóa.  Heildarflatarmál landsins er einungis 23.200 km².  Það á landamæri að Erítreu í norðri, Eþíópíu í vestri og suðvestri og Sómalíu í suðri.  Tadjouraflói, sem opnast út í Adenflóa, klýfur austurhlutann frá landinu og skapar að mestu hina 370 km strandlengju þess.  Höfuðborgin Djibouti stendur á kóralrifjum, sem teygjast út í suðurmynni flóans.  Aðrar aðalborgir eru Obock, Tadjoura, Ali Sabieh og Dikhil.  Höfn höfuðborgarinnar þjónar stórum hafskipum á leið þeirra um Indlandshaf og Rauðahaf og þar er varnarstöð franska sjóhersins.  Borgin er líka miðstöð járnbrautasamgangna til Addis Ababa, höfuðborgar Eþíópíu.  Landið fékk sjálfstæði frá Frökkum 27. júní 1977.  Stjórnvöld þess hafa lagt áherzlu á milligöngu milli stríðandi aðila í nágrenninu og stuðlað að frekari þróun innanlands á viðskiptasviðinu.