Vatíkanið er höfuðstöðvar katólsku kirkjunnar og sæti æðsta manns hennar, páfans, á vesturbakka árinna Tíber í Róm á Ítalíu.  Ríkið er ekki stórt, alls 44 hektarar, og þar með minnsta stjálfstæða ríki heims.  Miðaldamúrar þess í endurreisnarstíl marka landamæri þess nema í suðaustri, þar sem þau eru á torgi kirkju heilags Péturs (Piazza San Pietro).  Almenningi er veittur aðgangur að Vatíkaninu gegnum þrjá af sex inngöngum, um torgið Piazza, Bjölluhliðið (Arco delle Campane) á forhlið Péturskirkjunnar og inngang Vatíkanssafnsins og myndasafnsins í norðurmúrnum.  Mikilfenglegasta bygging Páfaríkisins er Péturskirkjan, sem var byggð á 4. öld og endurbyggð á 16. og 17. öld fyrir arð af sölu aflátsbréfa yfir gröf heilags Péturs postula.  Hún er næststærsta kirkja heimsins; Yamoussoukro-basilíkan (1989) á Fílabeinsströndinni í Vestur-Afríku er stærri.

Vatíkanhöllin er aðsetur páfa.  Ríkið rekur eigin símakerfi, pósthús, garða, stjörnuathugunarstöð, útvarp, banka og lyfjaverzlun.  Svissneski lífvörðurinn hefur borið ábyrgð á öryggi páfa síðan 1506. Vatíkanið er háð umheiminum með flestar nauðsynjar.  Tekjuskattur er ekki innheimtur og engin takmörk á innflutningi peninga.  Rekstur ríkisins byggist á frjálsum framlögum rúmlega milljarðs katólíka um allan heim, arði af fjárfestingum og sölu frímerkja, myntar, bóka- og blaðaútgáfu.  Afkoma bankastarfseminnar hefur verið gerð opinber síðan snemma á 9. áratugi 20. aldar.