Hansasambandið var bandalag verzlunarborga, aðallega í Norður-Þýzkalandi, sem tókst að koma á einokun á verzlun á Eystrasalti og um alla Norður-Evrópu. Það hlaut nafn sitt af þýzka orðinu „Hanse”, sem merkir hópur eða félag. Hansasambandið varð til á 13. öld um hina öflugu verzlunarborg Lýbiku (Lübeck), sem hagnaðist á verzlun með salt og silfur. Lýbika var auk þess útskipunarhöfn fyrir Hamborg. Milli borganna var árið 1398 grafinn elzti skipaskurður í Evrópu; Stecknitzskurðurinn milli ánna Trave og Saxelfar.

Hansasambandið var bandalag kaupmanna í verzlunargildum borganna og þeir héldu árlega fundi, Hansadaga, oftast í Lýbiku, en sambandið rak líka stóra vörulagera og skrifstofur í London, Brügge, Björgvin og Hólmgarði. Á fundum voru teknar ákvarðanir út frá sameiginlegum hagsmunum félagsmanna. Með því að beita borgir viðskiptaþvingunum tókst sambandinu að ná fram vilja sínum gagnvart yfirvöldum á hverjum stað, en flota sambandsins var líka hægt að breyta í öflugan herflota, ef á þurfti að halda. Hansakaupmenn verzluðu einnig við Íslendinga á tímabili, sem kallað hefur verið Þýska öldin.

Skipin, sem Hansakaupmenn notuðu til vöruflutningar á Eystrasalti og í Norðursjó, voru svokallaðir Hansakuggar, afkomendur knarrarins, sem norrænir menn notuðu við landkönnun og verzlun. Hansakuggurinn hafði mikið lestarrými og var vel búinn til að verjast sjóræningjum.

Kort sem sýnir verslunarleiðina sem Hansasambandið réði yfir.

Hansakaupmenn náðu undir sig allri verzlun með vörur frá Eystrasalti, þar með töldu verðmætu rafi og skinnum. Það varð því forgangsmál fyrir ung konungsríki Norðurlanda að ganga milli bols og höfuðs á sambandinu. Sérstaklega reyndu Danakonungar að berjast gegn sambandinu, en höfðu lítinn árangur sem erfiði fyrr en leið á 16. öld.

Um 1400 hófu hollenzkir og enskir kaupmenn að sigla norður fyrir Jótland um Eyrarsund inn á Eystrasalt. Við þetta missti Hansasambandið einokunarstöðu sína. Með aðgerðum eins og Eyrarsundstollinum 1429 og verzlunareinokun 1602, tókst Danakonungum smám saman að veikja stöðu sambandsins. Síðasti Hansadagurinn var haldinn 1669 af þeim borgum sem eftir voru í sambandinu; Lýbiku, Hamborg, Brimar, Danzig (Gdansk), Rostock, Brúnsvík, Hildesheim, Osnabrück og Köln. Eftir það var sambandið ekki til í reynd.

Þessar upplýsingar eru af vef Wikipedia, þar sem ekki tókst að tengja við síðuna.