Upptök ánna Rín, Rhône, Aare, Reuss og Tessin eru á Gotthardsvæðinu.  Vatnasvið:  Rín 36.494 km², þar af 8.531 km² utan Sviss, Rhône 10.403 km² (3.456), Inn 2.150 km² (358) og Tessin 1.616 km².  67,7% vatnsfalla enda í Atlantshafi, 27,9% í Miðjarðarhafi og 4,4% í Svartahafi.  Meðalrennsli Rínar við Basel er 1.026 m³/sek.
Jurasvæðið er að mestu úr kalki.  Miðhálendið að mestu úr setlögum, sandsteini og samanþjappaðri möl og Alparnir að mestu úr graníti, gneiss (frumgrýti) og kalki.

Alpaskörðin urðu fyrst að samgönguleiðum á rómverskum tíma.  San Bernardino er yfirleitt fært allt árið.  Flest önnur skörð án jarðgangna eru lokuð vegna snjóa einhvern tíma á milli nóvember og maí ár hvert.

Jöklar eru 140 talsins, 1.556 km², og liggja yfir 3000 m hæð.  Í Sviss eru einhverjir lengstu skriðjöklar heims, s.s. Alesch-jökullinn, 23,6 km langur.

Þýzkan, sem töluð er í landinu er mállýzka, Schwyzerdütsch, en ritmálið er þýzka.

Í þjóðarráðinu (fulltrúadeild þingsins) sitja 200 kjörnir fulltrúar, sem deilt er hlutfallslega milli kantónanna (hver a.m.k. eitt sæti).  Stöðuráðið (öldungadeildin) hefur 46 sæti, tvö fyrir hverja kantónu.  Ákvarðanir þingsins verða að hljóta meirihluta atkvæða í báðum deildum til að verða að lögum.

Framkvæmdavaldið er í höndum sambandsráðsins (Bundesrat) eða öllu heldur ríkisstjórnar-innar, sem telur 7 og er kosin fjórða hvert ár af þinginu.  Engin kantóna má hafa fleiri en einn full-trúa í ríkisstjórn, sem kýs einn ur sínum röðum til forseta í eitt ár í senn og hann annast líka ráðu-neyti sitt.  Kosningaaldur er 20 ár.  30.000 undirskriftir þarf til að mál gangi til þjóðaratkvæða-greiðslu.  100.000 undirskriftir þarf til að koma þjóðarkröfu fyrir þingið, s.s. stjórnarskrárbreytingu.

Sambandsherinn.  Allir ríkisborgarar á aldrinum 20 til 50 eru undantekningalaust herskyldir.  Þeir, sem eru á þessum aldri og lausir frá frumherskyldu, geyma vopn og búnað heima hjá sér og verða að stunda reglulegar her- og skotæfingar árlega.  Svissneski lífvörðurinn í Vatikaninu er aldagömul hefð.

Fjöldinn allur af alþjóðastofnunum er í landinu:  Rauði krossinn í Genf (1863; Henri Dunant), Alþjóða vinnumálastofnunin, Alþjóða heilbrigðisstofnunin o.fl.  Genf er setur Evrópudeildar Sameinuðu þjóðanna.  Sviss er í EFTA, Evrópuráðinu, Þróunar- og viðskiptastofnuninni og hefur fríverzlunarsamning við ESB.

Landið er rýrt af hagnýtum jarðefnum og hráefnum.  Því var snemma hafizt handa við fullvinnsluiðnað ýmissar verðmætrar framleiðslu, verzlun og þjónustu.  Á þessum sviðum hefur Sviss náð svo langt, að það er riíkasta land í heimi með stöðugan og virtan gjaldmiðil.  Helztu burðarásar iðnaðar eru:  Efna-, lyfja-, véla-, vopna-, málm-, rafeinda-, leður-, gerviefna-, vefnaðar-, og matvælaiðnaður.  Úrsmíði hefur í auknum mæli orðið að mæta samkeppni tölvuúra.  Iðnaðarvörur eru 80% af útflutningi Sviss.

Sviss verður að flytja inn alla orkugjafa nema vatnsorku, sem stendur undir 80% af orku-þörfinni.  15% eru framleidd í þremur kjarnorkuverum og 5% í fjarvarmaveitum.  U.þ.b. þriðjungur raforkunnar fer til iðnaðar.

Landbúnaður hefur tiltölulega lágan sess, þar eð erfitt er að stunda hann í fjöllunum og mestur hluti hans er stundaður á hinu takmarkaða láglendi Alpaforlandsins.  Engu að síður fram-leiðir Sviss rúmlega helminga allra matvæla, sem neytt er í landinu.

Ferðaþjónusta er mikilvæg, þótt Sviss sé dýrt ferðamannaland.