Á víkingaöld (um 800-1050) voru Skandínavar ein mesta siglingaþjóð í Evrópu. Þeir sigldu á knörrum og réru langskipum, og fóru ýmist með ófriði eða stunduðu verzlun. Sums staðar settust þeir um kyrrt í hernumdum löndum og stofnuðu sjálfstæð víkingaríki. Svíar herjuðu í austurveg um Eystrasalt, sigldu upp eftir ám og stofnuðu Garðaríki á Rússlandi; höfuðstaðir voru Hólmgarður og Kænugarður, sem nú heita Novgorod og Kiev. Danir og Norðmenn fóru í vesturveg, stofnsettu víkingaríki í kringum Jórvík á Englandi austanverðu, í Orkneyjum, í kringum Dyflinni á Írlandi og í Normandí á Frakklandi með höfuðstað í Rúðuborg, nú Rouen. Í þessum löndum runnu norrænir menn saman við innfædda og týndu smám saman tungu sinni og þjóðerni.

Áhrifa þeirra gætir þó enn víða í örnefnum og norrænt mál, norn, var talað á skosku eyjunum fram á 18. öld. Varanlegast varð landnám norrænna manna þar sem þeir hittu fyrir mannauð eða fábyggð lönd, í Færeyjum, á Íslandi og Grænlandi. Forn víkingaskip hafa fundist í Noregi og Danmörku, sæmilega varðveitt í jörðu og sjó. Eftirlíkingar sem gerðar hafa verið í nútíðinni sanna, hve þau hafa verið góðir farkostir. Stílfærðar myndir í íslenskum handritum sýna að lag skipanna hefur haldist fram eftir öldum.

Nishny Novgorod hét Gorky á árunum 1932-90 og á tímum víkinganna, Hólmgarður.  Hún er höfuðborg Nizhegorodhéraðs í Vestur-Rússlandi viðármót Volgu og Oka, 420 km austan Moskvu.

Þrátt fyrir sögulegar heimildir í Íslendingasögunum er saga borgarinnar ekki rakin lengra aftur en til 1221, þegar hún var sögð stofnuð af Yury Vsevolodovich, prins af Vladimir, þegar landnámið færðist að Volgu inn í lönd mordvína.  Lega borgarinnar við aðalleiðina frá Eystrasalti til Mið-Asíu var mjög mikilvæg hernaðarlega og Okaáin var skipgeng til Vladimir-Moskvusvæðisins og Kamaáin til Úralfjalla og Síberíu.  Árið 1392 var borgin innlimuð í furstadæmið Moskvu og varð skömmu síðar rússnesk virkisborg til varnar gegn Volgutatörum.  Ivan III, hinn mikli, og Ivan IV, hinn grimmi, hófu þaðan herferðir til Kazan, höfuðborgar tatara, árin 1469 og 1552.  Verzlun óx mikið um miðja 16. öldina, þegar Rússar höfðu náð yfirráðum yfir Volgu.  Árleg kaupstefna, sem komst á árið 1817, varð hin stærsta og mesta í Rússlandi og laðaði til sín kaupmenn frá Evrópu og Asíu allt til byltingarársins 1917.  Rithöfundurinn kunni, Maksim Gorky, fæddist í borginni 1868 og hún var nefnd Gorky honum til heiðurs en gamla nafnið var tekið upp á ný árið 1990.

Hin mikla verzlun, sem átti sér stað í borginni, leiddi af sér þegnskylduvinnu í verksmiðjum og þar með upphaf iðnþróunar mun fyrr en víðast annars staðar í Rússlandi, einkum í þungaiðnaði.  Mikilvægi Nizhny Novgorod sem iðnaðarborgar óx stöðugt, einkum í báðum heimsstyrjöldunum vegna þess, að verksmiðjur vestar í landinu voru jafnaðar við jörðu.  Nútímaborgin er ein hin stærsta í landinu og kjarni stórs og sívaxandi höfuðborgarsvæðis meðfram Volgu og neðri hluta Okaárinnar.  Framleiðsluvörur borgarinnar eru aðallega farartæki, ýmsar gerðir skipa til notkunar á ánum, dísilvéla, vélbúnaðar og tækja og margs konar efna- og neyzluvöru.  Helztu útborgirnar eru Bor, handan Volgu (gler, öryggisgler), Dzerzhinsk (efnavara og tilbúinn áburður), Balakhna og Pravdinsk (pappír), Bogorodsk (leðurvörur og skór) og Kstovo (olíuhreinsun).  Kolaorkuver í borginni, móorkuverið í Balakhna og vatnsorkuverið í Zavolzhye framleiða nauðsynlega raforku fyrir stórborgina.  Samgöngur á ánum, þjóðvegum, járnbrautum og í lofti eru mjög góðar.  Járnbrautin tengist Moskvu, Kirov (við Síberíubrautina) og Arzamas.  Raflestir eru notaðar innan borgarinnar.

N.I. Lobachevsky ríkisháskólinn var stofnaður 1918 og æðri menntastofnanir eru meðal margra skóla borgarinnar.  Þar er líka stórt ríkislistasafn og eitthvert elzta dramaleikhús landsins (1798).  Sögulegar byggingar borgarinnar eru m.a. 16. aldar virki (kremlin) og 17. aldar Erkiengisdómkirkja.  Áætlaður íbúafjöldi árið 1995 var 1,4 milljónir.

Nishny Novgorod er ein af ellefu borgum í Rússlandi sem riðlakepni HM 2018. mun fara fram

Ísland er fámennasta landið í sögunni sem tryggir sér sæti á lokamóti HM í knattspyrnu karla (2018) eftir 2:0-sigur á Kósóvó á Laugardalsvelli 9. oktober 2017.
Strákarnir dvelja hótel Nadezhda í bæn­um Gelendzhik við Svarta­hafið á meðan HM stendur yfir.