Portúgalska nafn eyjanna er Arquipélago dos Açores.  Aðaleyjar þessa eyjaklasa í Norður-Atlantshafi eru níu talsins.  Þær liggja u.þ.b. 1600 km vestan Portúgals.  Heildarflatarmál alls eyjaklasans er u.þ.b. 2247 km² en þær skiptast í þrjá klasa:  Austureyjarnar São Miguel, Santa Maria og Formigaseyjar; Miðeyjarnar Faial, Pico, São Jorge og Terceira og Norðvestureyjarnar Flores og Corvo.  Höfuðborgin er Ponta Delgada á São Miguel.  Nálægasti staður á meginlandinu er Rocahöfði í Portúgal, sem er 1408 km austan Santa Maria, þannig að Azoreeyjar eru hinar fjarlægustu meðal Austur-Atlantseyja frá meginlandinu.  Þær rísa sæbrattar úr hafi, allt upp í 2351 m á Pico, og sums staðar eru litlar malarfjörur í víkum.  Jarðfræðilega eru þær óstöðugar eins og kemur fram í jarðskjálftum og eldgosum.  Árið 1522 grófst bærinn Vila Franca do Campo og síðan höfuðborgin á São Miguel í jarðskjálftum og eldgosum og 1957-58 stækkaði Capelihnoseldgosið Faialeyju.