SAGAN  Kólumbus skírði eyjuna, sem hann fann árið 1493, eftir fjalllendinu norðvestan Barcelona.  Á fyrri hluta 17.aldar komu katólikkar, sem Cromwell rak frá Englandi, til eyjarinnar og enn þá er spor þeirra að finna í staðarnöfnum.  Eftir að Frakkar og Bretar höfðu barizt í rúma öld um yfir-ráðin, féll hún til Breta í Versalasamningunum árið 1783.  Á árunum milli 1871 til 1956 var hún hluti af Brezku-Hléeyjum og árin 1958 til 1962 var hún í Vestur-Indíabandalaginu.  Árið 1967 varð hún að brezkri krúnunýlendu með heimastjórn, sem landstjóri brezku krúnunnar stýrir.

Árið 1965 varð flugslys við Chances Peak og fjöldi manns fórst.  Undanfarin ár hafa margir þekktir tónlistarmenn komið til eyjarinnar til að hljóðrita tónlist sína (Elton John, Stevie Wonder, Boney M. o.fl.).

Rúmlega 90% íbúanna eru negrar og múlattar.  Líkt og hvíti minnihlutinn eru þeir í meþódista-, katólsku- eða anglíkönsku kirkjunum.  Fólksfækkun varð á eyjunni á árabilinu 1939 til 1971.  Margir urðu að flytja brott vegna samdráttar í efnahagslífinu.

Hin síðari ár hefur tekizt að koma efnahagslífinu í gang á ný með uppbyggingu lítilla iðn-fyrirtækja (gerviefni, vefnaður, elektróník) og stofnunar iðnskóla.  Byggingariðnaður hefur lifnað við í tengslum við ferðaþjónustuna, sem vex fiskur um hrygg.  Margir eftirlaunþegar koma til sumardvalar frá Norður-Ameríku nú.  Aðeins lítill hluti ræktanlegs lands er nýttur til ræktunar græn-metis, ávaxta (líka ananas) og jarðhnetna.  Lögð er áherzla á aukna ræktun fyrir innanlandsmarkað til að spara gjaldeyri.  Á 60 ha svæði er ræktuð hin verðmæta eyjabaðmull, sem síðan er unnin í nýtízkuverksmiðju.