Winnipeg er höfuðborg (1870) Manitobafylkis í Kanada.  Hún stendur við ármót Assiniboine- og Redánna, 65 km suðsuðvestan Winnipegvatns og 95 km norðan landamæranna að Minnesota (BNA).  Eftir að franski könnuðurinn La Vérendrye byggði þar virkið Rouge 1738 myndaðist verzlunarstaðirnir Fort Gibralter (Norðvesturfélagið 1804) og Fort Garry (Hudsonflóafélagið 1821). Skozka byggðin frá árunum 1811-12 og byggðin við Rauðá mynduðu kjarna verðandi borgar, sem var skírð Winnipeg eftir stöðuvatninu.  Nafnið er úr máli creeindíána (win nipee) og þýðir gruggugt vatn.

Árið 1881 náði Kyrrahafsjárnbrautin til Winnipeg og bærinn varð mikilvæg miðstöð viðskipta fyrir byggðirnar á sléttunum.  Borgin þjónar einnig námusvæðunum í norðri og er nú ein stærsta miðstöð samgangna, viðskipta, fjármála og tryggingarfyrirtækja landsins.  Iðnaðurinn byggist aðallega á kornmyllum (hveiti), kjöt- og matvælavinnslu, prentun, bruggun, framleiðslu fatnaðar, bíla og landbúnaðartækjum og velum.  Iðnvæðing borgarinnar byggist á ódýru rafmagni frá orkuverum við Winnipegána, náttúrulegu gasi og góðu samgöngukerfi, sem felst í mótum tveggja járnbrauta hafa á milli, aðalþjóðveginum þvert yfir landið og öflugum alþjóðaflugvelli.  Geysimikil flóð í Rauðá ollu miklu tjóni 1950 og 48 km langur flóðaskurður var grafinn og lokið 1967 til að fyrirbyggja endurtekningu.

Winnipeg er heimsborg, deigla margra þjóðerna og menningarmiðstöð Manitobafylkis.  Þar er symfóníuhljómsveit, Konunglegi ballettinn og Manitobaleikhúsið.  Manitobaháskóli (1877) er tengdur miðskólunum St. Boniface (1818), St. John (1866), St. Paul (1926), St. Andrew (1946) og Winnipegháskóla (1947), sem hét áður Sameinaði miðskólinn (United College).  Þinghús Manitoba (1920) er nýklassísk.  Gullni drengurinn, bronzstytta af unglingi með kyndil í annarri hendi og hveitibindi á vinstra armi, stendur ofan á hvelfingu þess.  Aldarmiðstöð borgarinnar hýsir náttúrugripasafn Manitoba (Man and nature) og stjörnufræðisafn.  Í ágúst ár hvert er haldin þjóðleg listahátíð í borginni.

Hinn 1. janúar 1972 sameinuðust nokkrir bæir Winnipeg (Saint Boniface, Saint James, Austur- og Vestur-Kildonan, Transcona og Saint Vital).  Áætlaður íbúafjöldi árið 1991 í Stór-Winnipeg var 652.354.