París, höfuðborg Frakklands er í 60 m hæð yfir sjó.  Hún er í Ile de France.  Íbúafjöldinn er í heild nálægt 10 milljónum (1997).  Í Ville de Paris búa 2,2 milljónir, þar af í gamla bænum hálf milljón.  Séu úthverfi talin með er íbúafjöldinn 8,5 milljónir.  París er langstærsta borg Frakklands.  Hún er efnahagsleg og menningarleg heimsborg og áhrif hennar hafa lítið minnkað, þótt sýslum landsins hafi verið veitt meiri sjálfstjórn á seinni árum.  París er eitt þétt- og fjölbýlasta svæði jarðar, þótt íbúum hafi fækkað frá sjötta áratugnum.  Borginni er skipt í 20 hverfi.  Fyrrum voru miðstéttirnar búsettar á hægri bakka Signu en ríkt fólk og aðallinn á hinum vinstri.  Hefðbundin nöfn sumra svæðanna falla ekki endilega saman við hverfaskiptinguna, enda oft komin af staða- eða byggingaheitum.

Í byrjun 12. aldar voru íbúarnir tæplega 100.000, um 1860 1,5 milljónir innan borgarmúranna, sem þá stóðu.  Flötur borgarinnar er 105 km² (Signa 7 km²; Reykjavík 248 km²).  Elzti hluti Parísar er á 'Ile de la Cité' (Borgareyju), þar sem stóð gallískt virki á dögum Sesars (Lutetia Parisiorum).  Hann varð miðja hinnar rómversku og franknesku Parísar.  Borgin stækkaði á hægri bakkanum á síðari miðöldum.  Þegar á 12. öld var París orðin miðstöð vestrænnar menningar með háskóla, sem dró að sér nemendur hvaðanæva að.  Sem aðsetur konunga bauð París upp á meiri og betri vernd en aðrar borgir og því flykktust fagmenn á ýmsum sviðum þangað, settust að og borgin þandist út.  Á 15. öld dró 100 ára stríðið úr vextinum.  Aðaluppbygging og þróun borgarinnar hófst á dögum Hinriks IV eftir trúabragðastyrjaldirnar.  Á meðan á stjórnarbyltingunni og eftirleik hennar stóð varð Frakkland nafli hins vestræna heims.  París var miðja Evrópu á keisaratímanum (1804-1814).  Listmunir og þekking, sem Napóleon kom með úr herferðum sínum fóru til að skreyta og auka hróður Parísar.  Borgin fór vel út úr báðum heimsstyrjöldunum.