Vels er hluti Stóra-Bretlands og stjórnmála-, laga- og stjórnsýslulega sameinað Englandi.  Landið er á stórum skaga á vestanverðu Stóra-Bretlandi og nær líka yfir eyjuna Anglesley, sem er handan mjós Menai-sundsins.  Norðan landsins er Írlandshaf, austan þess eru ensku skírin Cheshire, Shropshire, Hereford og Worcester og að vestan eru St. George’s-sund og Cardiganflói.

Mesta lengd landsins frá norðri til suðurs er 220 km og frá austri til vesturs 60-155 km.  Heildarflatarmálið er 20.766 km².  Cardiff er höfuðborgin og jafnframt stærst borga landsins og aðalhafnarborgin.

Ferðaþjónusta
Velska ströndin hefur verið vinsæl meðal brezkra sumarleyfisgesta allt frá upphafi 20. aldar.  Fjöllin hafa líka heillað göngu- og fjallamenn.  Síðasta aldarfjórðung 20. aldar varð ferðaþjónustan að einhverjum mikilvægasta atvinnuvegi landsins.  Ferðamálaráð og önnur yfirvöld, sem málið snertir, hafa lagt aukna áherzlu á varðveizlu ósnortinna landsvæða með stofnun þjóðgarða og friðlanda.