|
Denver er höfuðborg Colorado-fylkis.
Hún er kölluð míluhæðarborgin, því hún stendur í u.þ.b.
1,6 km hæð yfir sjó í Denver-sýslu og er hluti stórborgarsvæðis,
sem nær m.a. yfir bæinn Boulder. Hún er miðstöð viðskipta, iðnaðar, fjármála og
samgangna í mikilvægu kvikfjárræktar- og námuhéraði í Klettafjöllum.
Þar eru einhverjir stærstu sauðfjár- og nautgripamarkaðir
vestan Mississippifljótsins. Þar
eru höfuðstöðvar nokkurra alríkisstofnana og mörg fyrirtæki reka
þar rannsóknar- og þróunarmiðstöðvar fyrir hátæknivörur, sem
snerta byggingarefni, námuvinnslu, geimferðir, járnbrautir og efnavörur.
Denverháskóli var stofnaður
1864, Colorado-háskólinn 1912, Regis-háskólinn 1877, Listaskóli
Colorado 1952 og Yeshiva Toras Chaim Talmudical (lögbók gyðinga)-skólinn
1967. Meðal mikilvægra
menningarstofnana eru Listasafn Denver (8500 munir tengdir list indíána),
og Vestræna listasafnið (Frederic Remington, Charles M. Russell,
Thomas Moran, Georgia O’Keeffe).
Meðal áhugaverðra staða eru Zion babtistakirkjan (elzta slík
kirkja svartra í Colorado) og fylkisþinghúsið (í korintustíl;
byggt úr graníti 1887-95). Symfóníuhljómsveit
starfar í borginni auk nokkurra leikhópa.
Denver er mikill vetraríþróttastaður.
Meðal þekktra íþróttafélaga borgarinnar eru The Nuggets-körfuboltaliðið,
Broncos-ruðningsliðið og Colorado Rockies-hafnarboltaliðið.
Frumstæðir veiðimenn komu
til Colorado-svæðisins fyrir u.þ.b. 15.000 árum (Arapaho, Comanche
og Kiowa) og settust að á grasi vöxnum sléttunum.
Árið 1776 komu munkarnir Francisco Atanasio Dominguez og
Francisco Silvestre Véles de Escalante og könnuðu vesturhluta núverandi
fylkis. Árið 1858 fannst
gull við og í Suður-Platte-ánni, sem rennur um miðja Denverborg. Þá upphófst gullæði og bærinn varð að miðstöð
gullleitarmanna. Í nóvember
1864 tryggði blóðbaðið í Sandgili (orrusta við indíána) í
austurhluta fylkisins uppbyggingu og velmegun á því svæði.
Sjö hundruð bandarískir hermenn stráfelldu friðsama
Cheyenne- og Arapahoindíána, sem biðu þess að undirrita sáttmála
við stjórn landsins. Þá
voru u.þ.b. 130 innfæddir Bandaríkjamenn drepnir, 75% þeirra konur
og born. Aðrir indíánar
í þessum landshluta svöruðu með ítrekuðum árásum á hvítu
landnemana en hernum tókst að ná tökum á ástandinu 1869, þannig að
fjölgandi landnemum varð vært þar.
Byggðirnar, sem mynduðust þá, þróuðust í borgirnar
Auraria og st Charles. Hin
síðarnefnda var síðar skírð Denverborg eftir landstjórnanum James
W. Denver, sem var settur til bráðabirgða og árið 1860 voru báðar
byggðirnar sameinaðar.
Denver þróaðist áfram í
tengslum við áveitubúskap, iðnað og kornmyllur. Borgin komst í símskeytasamband við aðra hluta BNA árið
1863. Þjóðvegir voru lagðir
og fyrsta málmverið í Colorado hóf starfsemi í Black Hawk árið
1868. Denver varð að héraðshöfuðborg
árið 1867 og dafnaði á áttunda og níunda áratugi 19. aldar vegna
mikilla gull- og silfurfunda á nærliggjandi svæðum og lagninar járnbrautarinnar.
Á áratugunum 1870-90 fjölgaði íbúum úr 4759 í 106.713.
Áætlaður íbúafjöldi árið 1990 var tæplega 470 þúsund.
Denver er vinabær Akureyrar
Icelandair flýgur til
Denver
borgar.
Ferðatímabil 30. mars til
25. október 2014.
COLORADO |
