Belize er á austurströnd Yucatánskagans.  Þingbundið einræði.  Flatarmál er 22.965 km², íbúafjöldi er 160.000, höfuðborgin er Belmopan og tungumál enska, patois og spænska. Áætlunarflug oft í viku frá Mexíkóborg, Miami og Kingston (Jamaica) og Belize City.  Hægt er að komast með skemmtiferðaskipum eða flutningaskipum til Belize. Þegar ferðast er lengri vegalengdir í Belize, eru notaðar litlar flugvélar en fjórhjóladrifin farartæki á landi.

Mið-Ameríuríkið Belize, sem hefur verið sjálfstætt frá 1981, hét áður Brezka-Hondúras.  Það er á austurströnd Yucatánskagans, að mestu hulið hitabeltisregnskógi og lítið numið.  Aðalatvinnuvegur er landbúnaður og útflutningur landbúnaðarvara.  Ströndin er þakin lónum og fenjatrjám og fyrir henni eru litlar kóraleyjar og klettar, sem laða til sín á síðustu árum æ fleiri ævintýramenn, kafara og stangaveiðimenn.  Fjöldi fuglategunda á sér þarna samastað.  Líklegt má telja, að þessi ósnortna paradís verði líka fjöldaferðamennsku að bráð.

Norðaustan staðvindurinn ríkir hér allt árið.  Frá desember til apríl er þurrviðrasamt en frá maí til nóvember er regntími en þá gera oft hvirfilvindar vart við sig. Ársmeðalhiti er 27°C, bæði í lofti og sjó. Landsvæðið, sem liggur nú undir Belize, var miðsvæðis í löndum maya fram á 9. öld.  Spánverjar höfðu ekki áhuga á landnámi á þessum slóðum og létu því Englendingum eftir að setjast þar að.  Þeir hófu landnám á fyrri hluta 17.aldar.  Sjóræningjar leituðu oft skjóls fyrir ströndum Belize.  Á 18.öld vildu Spánverjar hrekja Englendinga á brott og árið 1798 kom til sjóorrustu við St. George's Cay (framundan núverandi höfuðborg, Belize City), sem Spánverjar töpuðu.