Listir.  Arabíska er opinber tunga Marokkómanna.  Franska og spænska eru talaðar víða um land og enska ryður sér til rúms.  Mikill almennur áhugi fyrir endurvakningu menningar berba hefur leitt til stofnana félaga, sem hvetja til upprifjunar þessara gömlu siða og hefða.

Útgáfa ritverka og fjölbreytni þeirra hefur aukizt.  Auk hefðbundinna verka, ljóðagerðar, ritgerða og sögulegra verka, gætir áhrifa frá Miðausturlöndum og Vesturálfu.  Flest verk, sem snerta félagsmál og náttúruvísindi, eru gefin út á frönsku en arabíska er algengari í verkum yngri kynslóðarinnar.  Bókmenntaleg verk eru gefin út á báðum tungum.  Rithöfundar landsins, s.s. Tahar Ben Jelloun, Mohammed Choukri, Driss Chraibi, Abdallah Laroui, Abdelfattah Kilito og Fatima Mernissi, gefa verk sín út á báðum tungumálunum.  Sköpun á sviði málara- og höggmyndalistar, popptónlistar, áhugaleikhúsa og kvikmynda hefur blómstrað.  Á sumrin eru haldnar margs konar þjóðlegar hátíðir um allt land á sviðum lista og tónlistar (Heilaga tónlistarhátíðin í Fez).

Daglegt líf í landinu snýst enn þá að mestu um heimilið og fjölskylduna.  Götukaffihús eru vinsæl meðal karlmanna.  Þar geta þeir m.a. horft á knattspyrnuleiki í sjónvarpinu.  Í stórborgunum býðst fjölbreytt afþreying, s.s. kvikmyndahús, veitingastaðir og nútímaverzlanir við breiðgöturnar eða þröngar og bugðóttar götunar í gömlu borgarhlutunum eða markaðir.  Víða á langri strönd landsins eru baðstrendur.  Sumar þeirra eru í einkaeign en flestar eru þó opnar almenningi.  Um helgar fara fjölskyldur oft á ströndina til að synda og stunda aðrar íþróttir.

Afþreying.  Fyrrum voru hestaíþróttir vinsælastar meðal áhorfenda en evrópskar íþróttir hafa vinninginn nú.  Knattspyrna, póló, sund og tennis ruddu sér til rúms í lok 19. aldar.  Knattspyrnan er vinsælasta áhorfendaíþróttin og ungt fólk í borgunum stundar hana af kappi.  Árið 1970 varð Marokkó fyrsta Afríkulandið til að taka þátt í heimsmeistarakeppninni í knattspyrnu.  Á Ólympuleikunum 1984 unnu tveir Marokkómenn gullverðlaun í frjálsum íþróttum.  Annar þessara keppenda var fyrsta múslimska konan, sem bar sigur úr býtum á Ólympíuleikum.  Tennis og golf hafa líka áunnið sér vinsældir.  Nokkrir keppendur frá Marokkó hafa tekið þátt í alþjóðlegum keppnum og þeir unnu sér fyrsta Davíðsbikarinn árið 1999.  Konungsfjölskyldan er mjög áhugasöm um þessa íþrótt.

Fjölmiðlar.  Ríkisfjölmiðlarnir, útvarp og sjónvarp (Radiodiffusion, TRM Télevision Marocaine), ná til allra landsmanna.  Útvarpað er á arabísku, frönsku, berbamáli, spænsku og ensku en sjónvarpað á arabísku, berbamáli og frönsku.  Einkasjónvarpsstöðvar eru í Casablanca og útvarpsstöðvar í Tangier.  Árið 1996 var söludeild ríkissímafélagsins einkavædd með lögum en ríkið á fasteignir og kerfi þess.  Gervihnattadiskar eru víða á húsþökum, jafnvel í fátækrahverfunum.  Nettengingum fjölgar stöðugt og allar aðalstofnanir landsins eru tengdar.  Víða eru netkaffistaðir, þar sem hægt er að komast í tengingu við umheiminn.

Dagblöð eru u.þ.b. 12 talsins.  Þau eru gefin út á arabísku og frönsku í Rabat, Casablanca og Tangier.  Flest þeirra eru málgögn stjórnmálaflokka og hin annaðhvort ríkisrekin eða hlynnt ríkisstjórninni.  Tímarit af ýmsum gerðum eru algeng.  Mikið ólæsi í landinu gerið það að verkum, að lesendafjöldi er mjög takmarkaður og sjónvarpið er aðalfjölmiðillinn fyrir fjöldann.