Montevideo er höfuðborg Úrúgvæ og samnefnds héraðs.  Hún er við norðanverða árósa Río de la Plata.  Bruno Mauricio de Zabala, landstjóri í Buenos Aires, stofnaði borgina árið 1726 til að draga úr aðstreymi Portúgala til þessa landshluta frá Brasilíu.  Á fyrstu árunum var þarna spænsk setuliðsborg.  Í lok nýlendutímans fóru viðskipti að aukast og kaupmennirnir áttu mikinn þátt í því, að landið fékk sjálfstæði.  Á árunum 1807-30 var borgin á víxl undir yfirráðum Breta, Spánverja, Argentínu og Brasilíu.  Það dró úr viðskiptum og íbúum fækkaði.  Sjálfstæði fékkst 1830 án þess að stöðugleiki væri tryggður.  Úrúgvæ var leikvangur innlendra, argentínskra og brasilískra áhrifa, sem náðu hámarki í umsátri sameinaðra herja Argentínu og Úrúgvæ á árunum 1843-51.  Varnarlið borgarinnar naut aðstoðar Frakka og Englendinga, sem héldu uppi hafnbanni á Buenos Aires.  Afleiðingin var sú, að Montevideo blómstraði á þessum tíma og varð að mikilvægri hafnarborg  við Río de la Plata.

Um höfnina fer mestur hluti út- og innflutnings landsins.  Mest er flutt út af ull, kjöti og húðum.  Ullin er unnin í verksmiðjum í borginni og kjötvinnslur sjá um frystingu og undirbúning kjötafurðanna.  Verksmiðjur, sem framleiða vefnaðarvörur, skó, sápu, eldspýtur og fatnað eru um alla borgina.  Einnig er framleitt vín og mjólkurvörur.  Meðal stærstu fyrirtækja landsins eru Ancap (Administración Nacional de Combustibles, Alcohol y Portland) olíuhreinsunarstöðvarnar og sementsverksmiðjurnar, járnbrautaverkstæði og orkuveitur.

Höfnin er mesti athafnastaður borgarinnar.  Flugsamgöngur eru tryggðar um flugvöllinn í Carrasco, fjórar járnbrautalínur skerast í borginni og vegir liggja til annarra aðalborga.

Æðri menntunar er aðeins hægt að afla sér í höfuðborginni.  Lýðveldisháskólinn var stofnaður 1849.  Verklegi háskólinn (1878) annast verklegu hlið námsins og starfar eins og námsflokkar.

Leikhúslíf hefur verið fjörugt í borginni síðan Casa de Comedias var opnað 1795.  Síðan komu Teatro San Felipe og Teatro Solis (enn við lýði; 1856).  Náttúrusögusafnið (1900), Náttúruþjóðminjasafnið (1837), Þjóðlistasafnið (1911) og Þjóðarbókhlaðan (1816) eru meðal áhugaverðra staða borgarinnar.  Knattspyrnuvöllurinn er í Batlle y Ordónez-garðinum og víða í öðrum görðum er afþreyingu að finna.  Þá er hægt að velja úr röð baðstranda alla leið að Punta del Este við Atlantshaf.  Áætlaður íbúafjöldi 1980 var tæplega 1,3 miljónir.