Esztergom er borg í Komárom-sýslu í Norður-Ungverjalandi við Dóná, ófjarri Budapest.  Helztu framleiðsluvörur hennar eru þungavélar, múrsteinn, járnvara, dúkur og vín.  Umhverfis borgina er stórt landbúnaðarhérað.  Esztergom var eitt sinn höfuðborg landsins og þar reis fyrsta kristna kirkja þess.  Hún er fæðingarstaður Stefáns I af Ungverjalandi, sem var krýndur þar árið 1001.  Borgin hafði lengi verið miðstöð verzlunar, þegar mongólar eyddu henni árið 1241. Síðar á 13. öldinni var hún endurbyggð og víggirt.  Tyrkir náðu henni tvisvar undir sig á árunum 1543-95 og 1604-83.  Borgin er setur rómversk-katólsks erkibiskups og þar hófst bygging stærstu dómkirkju landsins árið 1820.  Hvelfing hennar er í mynd Péturskirkjunnar í Róm og í henni er kross, sem Sylvester II páfi gaf Stefáni I.  Þarna er einnig erkibiskupshöllin í endurreisnarstíl, sem hýsir nú kristnisafn.  Heilsulindir borgarinnar laða æ fleiri ferðamenn að.  Áætlaður íbúafjöldi 1989 var rúmlega 32 þúsund.