Höfuðborg Hessen er í 117 m hæð yfir sjó við rætur Tánushæða.  Úthverfi hennar ná alla leið að Rín.  Wiesbaden er eftirsóttur heilsubótarstaður vegna 27 volgra lauga, milds loftslags og fagurs umhverfis.  Fjörugt leikhúslíf og nútímaverzlanir laða líka að.  Þar eiga aðsetur sitt Glæpadómstóll Þýzkalands, aðalmiðstöðvar þýzkrar kvikmyndagerðar og margar bókaútgáfur.  Í og við Wiesbaden eru flestir stærstu vínkjallarar Þýzkalands.  Þar fer fram Rínarhrekkjavakan, hestamannamót í hallargarðinum í Biebrich (maí), alþjóðlegir Maíhátíðarleikar, sumahátíðir með skrautlýsingum, skoteldum og dansi í Heilsubótargarðinum (ágúst), Vínhátíð Rheingau í Heilsubótarhúsinu (sept.) og Andreasmarkaðurinn á Elsasstorgi (des.).

Rómverjar færðu sér laugarnar í Wiesbaden í nyt og nefndu staðinn Aqae Mattiacorum eftir þjóðflokki mattiaka (germanar), sem þar bjó.  Kládíus keisari (41-50 e.Kr.) lét byggja þar virki og rómversku böðin voru þar sem nú stendur Eldabrunnurinn (Kochbrunnen).  Rómverjar yfirgáfu svæðin austan Rínar árið 406 og frankar gerðu Wiesbaden að höfuðstað sínum.  Þá var byggð frankneskt turnvirki á núverandi hallarsvæði.  Einhard, ævisöguritari Karls mikla, minntist fyrstur á staðinn Wisibada, baðið á engjunum, árið 829.  Þróunin í átt að ríkisborg hófst á 13. öld. 

Friðrik II hélt hvítasunnuna hátíðlega þar árið 1236.  Erkibiskupinn í Mainz náði borginni undir sig og eyðilagði hana árið 1242.  Nassaugreifar náðu henni undir sig um 1270 og byggðu sér þar óðal.Karl fursti af Nassau-Usingen tók upp búsetu þar árið 1744 í nýbyggðri Biebrichhöllinni.  Árið 1816 varð Wiesbaden stjórnsetur nýstofnaðs hertogadæmis Nassau og blómlegir tímar fóru í hönd.  

Borgin varð vinsæl sem heilsubótarstaður og hús voru byggð í biedermeierstíl.  Meðal gesta baðanna voru furstar og fleira mektarfólk (Goethe 1814-15).  Hertogarnir Friedrich August (1803-16) og Wilhelm (1816-39) létu skipuleggja og gera fallegar breiðgötur og byggja fallegar, klassískar byggingar.  Árið 1868 varð hertogadæmi prússneskt og borgin höfuðborg héraðsins.  

Allt fram undir fyrri heimsstyrjöldina var Wiesbaden mótstaður keisara og hirðar.  Á árunum 1926-28 sameinuðust nokkur sveitarfélög Wiesbaden, þannig að borgin óx verulega og síðan 1945 hefur hún verið höfuðborg Hessen.

Skoðunarvert  
*Heilsubótarsvæðið er við norðurenda aðalgötu borgarinnar, Wilhelmstraße og sunnan súlnaganga Hessneska leikhússins (1892-94).  Heilsubótarhúsið (1905-09; Friedrich von Thiersch) er skrautleg hátíðarbygging með jónískum súlum í anddyri og spilavíti í vinstri álmunni.  Heilsubótargarðurinn er bak við húsið.

Höllin (1837-41) er við Hallartorgið í hjarta borgarinnar.  Þar er nú þingið og ráðuneyti.

*Nerófjall (245m) rís skógi vaxið norðan borgarinnar.  Tannhjólabraut liggur þangað upp, að góðum útsýnisstað við grísku kapelluna, sem blasir víða við.

Dýra- og fuglagarðurinn Fasanerie er norðvestan borgarinnar við Schützenhausweg.

Biebrichhöllin (1698-1744), aðsetur Nassauhertoganna var endurbyggð í barokstíl.  Þar er aðalmiðstöð helztu kvikmyndafyrirtækja Þýzkalands.

*Eberbachklaustrið er 17 km vestan Wiesbaden.  Klausturskirkjan frá 1186 og byggingar þess frá 12. og 14. öld eru í góðu ástandi (Þýzka vínakademían; sumartónleikar).