Saarbrücken, höfuðborg Saarlands, er í 182 m hæð yfir sjó í skógi vöxnum Saardalnum.  Hún er miðstöð viðskipta og iðnaðar í Saarlandi.  Þar er háskóli, tónlistarskóli og fleiri menntastofnanir auk útvarps- og sjónvarpsstöðva.  Iðnaðurinn byggist aðallega á stálframleiðslu, framleiðslu elektrónískra tækja, sjóntækja, kalks og sements.  Borgin er líka mikilvæg fyrir ýmiss konar vörusýningar, enda í næsta nágrenni við frönsku landamærin.Uppruna Saarbrücken má rekja til keltnesks þorps, sem stóð þar fyrrum.  Rómverjar byggðu brú yfir Saar til að tryggja samgöngur og höfðu varðstöð þar í litlu virki.  Síðar stóð þarna franska konungshöllin Villa Sarabrucca.  Saarbrücken lifði aðalblómaskeið sitt sem bústaður greifa og síðar fursta af Nassau-Saarbrücken, einkum á 18. öld, þegar Heinrich fursti (1741-68) ríkti.  Þá lét hann byggingarmeistarann Friedrich Joachim Stengel prýða borgina mörgum barokbyggingum.  Miklar birgðir járns og kola í jörðu gerðu borgina að mikilvægri miðstöð viðskipta og iðnaðar á 20. öld.

Skoðunarvert
Höllin var byggð á 19. öld og er nú stjórnsýslusetur.  Þaðan er fallegt útsýni yfir borgina.  Steindar rúður hallarkirkjunnar (G. Meistermann) og furstagrafirnar kynnu að vekja áhuga sumra.

*Ludwigskirkjan er í grennd við samnefnda höll.  Hún var endurbyggð og er nútímalega að innan.

*Klausturkirkjan St. Arnual (13.-14. öld) er í borgarhverfinu St. Arnual.  Þar er fjöldi grafsteina aðalsmanna af Nassau-Saarbrückenætt.

Þýzk-franski lystigarðurinn með vatnsorgeli og Gulliversýningu er í borginni suðvestanverðri.

Saarlandsháskólinn er í fallegum skógi við Schwarzenberg, 5 km norðaustan borgarmiðjunnar.  Við vegin til St. Ingbert (B40) er Halberghöllin og Útvarp Saarland til hægri og vegurinn að Dýragarðinum með rúmlega 600 dýrategundir.